Rai ka dorbar ha Nongkhroh ban khang shisyndon iaka jingbret ñiut ka Jowai Municipal Board ha Thadmusem

Syllad | The Rising MeghalayaJanuary 10, 2022

Ka Elaka Nartiang Coordinate Committee (ENCC) da kawei ka sur kala shim iaka rai ban pyneh beit triang ban pyrshah iaka jingbret ñiut ka Jowai Municipal Board ha Mooshutsdai Mookabeng ka jaka kaba hap ha Thadmusem bad hajan ka shnong Sohphoh, West Jaintia Hills District.

Ia kane ka rai ka ENCC kala shim haka jingialang kaba long haka 10 tarik Kyllalyngkot 2022 haka shnong Nongkhroh.

U Organising Secretary ka (ENCC) u Ma Katbanbiang Lamare ula ong ba ka jingialang kaba khot Dorbar shnong Nongkhroh haka jingiadonlang ki dkhot ka ENCC kala pynrem jur ruh ïa ka Jowai Municipal Board ba leh bor bad thombor iaka sur u paidbah.

Ula ong ba haka jingshisha ka jingialang hapdeng ka ENCC bad ka JMB ka dei ban long haka 7 K’Lyngkot, pynban ka JMB kala leit ban bret ïaki ñiut naduh 5 tarik K’Lyngkot bad khlem ap iaka rai jong u paidbah jong ki san tylli ki shnong kiba hap hapoh ka lama jong ka ENCC ba kynthup iaka Nongkhroh, Larnai, Sohphoh, Thadmusem bad Kdohkule bad ki sengbhalang kiba iatreilang bad ka committee.

“Ngi la shim iaka rai kaba khatduh bad ngin nym shah iaka Jowai Municipal Board ban leit bret ïaki ñiut ha katei ka jaka bret niut ba thymmai jong ka ha Mooshutsdai Mookabeng namar ba kala leh bor shaba palat liam u paidbah ka thain bad lada iaid shakhmat ka jingbret ñiut kan ktah iaka sawdong sawkun ka mariang,” la ong u ma Katbanbiang.

Ula buh jingkylli ruh balei ka Jowai Municipal Board kala shah beh na Mynkjai, hato kam dei naka jinglehtorti jong ka ban bret ïaki ñiut ki ñier khlem da ka pyndonkam iaka juk stad saian? Ula ong shuh shuh ba kane ka jaka bret ñiut thymmai ruh ka dei kaba don ha jrong lum bad lada iaid shakhmat ka jingbret ñiut kan ktah ia baroh ka sawdong sawkun ka jaka bad iaka koit ka khiah u briew bad ki mrad.

Ka jingïalang paitbah ka Dorbar shnong Nongkhroh kala rai rangbah ba naduh mynta sngi kan khang noh shi syndon ïa katei ka jaka bret ñiut ha Mooshutsdai.