Rai ka dorbar pyllun Sahsniang ban pynneh iaka shongsuk shongsain

Syllad | The Rising MeghalayaMarch 9, 2023

Ka Dorbar Pyllun jong ka Shnong Sahsniang kynthup ia Sahsniang-A bad ka Sahsniang Saitthad (B) kala rai da kawei ka sur ban pynneh iaka shongsuk shongsain hapoh ka shnong Sahsniang baroh kawei hadien bala mih ka jingklumar naka result elekshon MLA.

Ia kane ka rai ka dorbar pyllun Sahsniang kala shim haka jingialang kaba long haka sngi Palei haka shnong Sahsniang A.

La iadonlang ha kane ka jngialang naduh Executive Magistrate, West Jaintia Hills District u Bah WK Kharlukhi, JM Sangma, DSP (Law & Order), u Ma Rimaya Muksor Assistant Director Information & Public Relation, Jowai.

U Secretary Joint Committee, Sahsniang-A bad Sahsniang-B ula ong ba ka dorbar pyllun da kawei ka sur kala rai ban pynneh iaka shongsuk shongsain bad kala rai ruh ban kyrpad ia u District Magistrate ban weng noh iaka curfew miet kaba la pynjari ha Sahsniang hadien ba kine ki ar shnong kila rai ban pynneh iaka shongsuk shongsain.

Ka Dorbar Pyllun kala shimkhia ban lum iaka dorbar ban wanrah biang iaka shongsuk shongsain namar ba ka la dei ruh ka por ban long skul ki khynnah bad ki paidbah ruh kin ioh ban trei ban ktah bad ruh ban ioh pyntrei ia ka MGNREGS bad kiwei kiwei.

Ka dorbar pyllun kala shim ruh iaka rai ba lada dang don kano kano ka jingpynklumar hapoh shnong, ka executive committee kan shim ia ka jingbah khlieh bad ka dorbar ka la rai ruh ba ki ar tylli ki executive committee shnong ba kin leit ia syllok ia ki iing kiba mat ia ka jingsngewsih.

Ka dorbar kala kyntu jur ia ki paidbah ba ym dei ban kren pynmong ne pynsngewsih iano iano bad khamtam ia kito ki longiing long longsem kiba la shah ktah lyngba ka jingmih ki jingklumar bad lada don kum kita, ka Dorbar kan shimti ia kum kita ki briew bad aiti ia ki sha ki bor jong ka ain.

Ia ka jingialang la pyniaid da u ma Poimon Laloo, Waheh Chnong Sahsniang Saitthad (B) bad la ioh ka jingkren na u Ma D. Ymbon Waheh chnong Sahsniang-A, u Rev. E.C.H Passah Ma Gilbert Sten bad u Ma Habahun Dkhar MDC ka 13-Saphai Constituency.