Rai ka dorbar shnong Khanduli da kaba tyngeh pyrshah iaka khyrdop ka Karbi Anglong Autonomous Council

Syllad | The Rising MeghalayaApril 21, 2023

Ka Dorbar Shnong Khanduli, West Jaintia Hills District kala shim iaka sienjam kaba tyngeh da kaba rai ban khang noh shisyndon iaka leit ka wan u paidbah baroh ar liang ka khappud Assam Meghalaya.

Ia kane ka dorbar shnong Khanduli kala shim hadien ba ka Karbi Anglong Autonomous Council (KAAC) kala sieh biang iaka signboard khrong khajna jong ka ha Khanduli.

Kane ka rai jong ka dorbar shnong shnong kan sdang naduh lashai ka sngi Saitjain naduah 4 baje mynstep katba Karbi Anglong Autonomous Council (KAAC) kam weng ia katei ka khyrdop lum khajna jong ka.

Haba ïakren bad u Waheh Shnong Khanduli u Yooshida Nongspung ula ong ba ïaki nongshong Shnong jong ka thaiñ Khanduli ba kim dei ban hiar sha Assam ban leit ïaki jingdonkam jong ki bad ki nong Karbi ruh kim dei ban rung shaka thaiñ Khanduli katba ka Karbi Anglong Autonomous Council (KAAC) kam pat weng ïa katei ka signboard.

Ula ong kane ka jingkhang ïaka leit ka wan ka rung ka mih jong ki nongshong shnong kadei namar ba Dorbar Shnong Khanduli ka pyrshah ïaka jingbuh khyrdop khrong khajna ka KAAC hapoh u pud u sam ka Khanduli.

Ula kyntu ïaki marjan Shnong kum ka Lapangap, Chebnai, Taloo, Umshangïar, Umplu, Saitsama, Mukoiram bad kiwei kiwei ki shnong ban ïatreilang bad ka Dorbar Shnong Khanduli.

Ka Dorbar Shnong Khanduli ka la pynrem ïaka jingkam jong ka Deputy Commissioner jong ka West Karbi Anglong District ka Krishna Buruah ba ka Khanduli ka hap hapoh ka West Karbi Anglong District.

Ula ong ba kane ka Dc kala shu kam bad kren laplah khlem da tip ïaka duh ka dang. “Kum ki nongshong shnong ngi sngew sarong ba ngi ïoh ïa u Bah Draison Kharshiïing kum u MDC la lai sien bad kum u MLA na ka Shnong Khanduli uba la iakhun ban iada ia u pud u sam haka por jong u,” la ong Yooshida.

Ula ong ba ka Khanduli ka hap hapoh ka jingsynshar jong ka West Jaintia Hills District bad sorkar Meghalaya dei namar kata kadaw ngi pynrem ïaka jingkam khlem nongrim jong ka DC jong ka West Karbi Anglong District.

Ban pynrem shuh shuh ïaka jingkam jong ka DC West Karbi Anglong District, u Compromise Nongrum ula ong harum jong ka shnong Khanduli ka don ka Shnong Myn-i bad ki nongshong shnong jong ka Myn-i ki don ka dur thep vote na Meghalaya bad kiba bun ki jingmyntoi kynthup naduh ki kam pynroi, ki Aganwadi centre, ki skul, u khaw rashon ki ïoh lut na ka sorkar Meghalaya.

Ha kaba ïadei bad ka jingbuh ïaka signboard jong ka khyrdop khrong khajna ka KAAC hapoh u pud u sam ka Dorbar Shnong Khanduli, ula ong ba katei ka surok kaba ka KAAC ka sieh ïaka signboard, dei ka surok ba la mang da ka NEC bad ba la pyntrei da ka sorkar Meghalaya bad kham sharum ba ki buh ïaka khyrdop ruh ka dang dei hi ka jaka jong ka Meghalaya.