Rai ka dorbar shnong Khliehtyrshi ban kyrshan pura ia u ma Madonbai Rymbai CEM barim ka JHADC

Syllad | The Rising MeghalayaJanuary 31, 2025

Ka Dorbar Shnong Khliehtyrshi kala rai ban ai ka jingkyrshan kaba pura ia u Chief Executive Member barim ka Jaintia Hills Autonomous District u ma Madonbai Rymbai uba la mih ban aireng biang iaka elekshon MDC na Amwi Khliehtyrshi.

Ia kane ka rai ka dorbar shnong Khliehtyrshi kala shim haka jingialang kaba long haka 31 tarik ha phyllaw jong ka iing dorbar jong ka shnong ha Khliehtyrshi.

U Waheh Shnong Khliehtyrshi ma Kitbok Rymbai haba kren ula ong ba ia kane ka rai la shim hadien ba u ma Madon Rymbai ula phah ka shithi sha ka dorbar shnong ban pan iaka jingkyrshan na ka bynta ba un aireng biang ha kane ka elekshon MDC sha ka JHADC.

Ula ong ruh ba ki don lai ngut ki kyrtong napoh shnong Khliehtyrshi, u kyrtong ka VPP ula ka shithi kum ka jingpyntip, katba u kyrtong NPP kim ioh kano kano ka shithi bad dei halor kane ka jingkyrpad u CEM barim, ka dorbar shnong kala khot iaka jingialang ban shim iaka sur u paidbah.

Hadien kane ka jingialang paidbah hala shnong u ma Madonbai Rymbai ula mih ban pyndep iaka jingthep kyrteng ban iakhun iaka elekshon MDC.