Rai ka FASTOM ban pynlong da ka jingiakhih lada leh mynthi ka sorkar halor ki jingdawa

Syllad | The Rising MeghalayaOctober 9, 2023

Ka General Meeting jong ka Federation of All School Teachers Meghalaya (FASTOM) ka Seng jong ki nonghikai skul adhoc kaba la long ha ka 7 tarik mynta u bnai ha Madan New Nongstoin ka la shim ia ka rai ban ai por khatduh ia ka sorkar ba kan pynurlong noh ia ka jingdawa ka jong ki ban kyntiew kyrdan deficit ia baroh ki nonghikai skul Adhoc, kata naduh ki Lower Primary haduh ki kyrdan Higher Secondary School haduh ka 30 tarik u Iaiong 2024.

Nalor kata ka Federation ka la shim ruh ia ka rai ba lada ka sorkar kan dang iai leh mynti haduh katei ka tarik ba la ai por, na ka liang ka Seng kan mih biang sha surok ban pynlong da ki jingiakhih ba kham tyngeh. 

Ha kane ka General Meeting la wan iashim bynta da kumba 5 hajar ngut ki nonghikai skul adhoc, kata naduh ki skul LP haduh ki kyrdan Higher Secondary na kylleng ka jylla.

Lyngba une u kyrwoh ka Seng ka pyntip ba ha kane ka jingialang ba la pyniaid da u Vice President ka Federation u Bah Sanborn Jungai la ioh ruh ban pynskhem ia ki nongkitkam ba pura jong ka FASTOM Central Body kata na ka bynta ka samoi treikam 2023– 2026.

Ki nongkitkam ba la pynskhem ha kane ka jingialang ki kynthup ia u President Bah Diningroy Marwein, Vice President Sanborn Jungai bad Kinstar Momin,Genl Secretary  Sainbor John Lyngdoh, Joint Secretary Kong Deviana Syiem, Kong Evangeline Niangti bad Bah Senendro R.Marak, Finance Secretary Bah R.Sparland Khardewsaw, Organising Secretary Bah Rapborson Kharsynteng bad Biarson Marak, Publicity Secretary Bah E.G War, Auditors Bah Evansius Marwein bad Bah David Lyngkhoi.

Ia kine ki nongkitkam la pynskhem da u President ka FASTOM Garo Hills Region u Elvis R.Marak.

Ha kaba sdang jong ka jingialang la ioh ka jingkren pdiang na ka Joint Secretary Kong Deviana Syiem, bad la ioh ruh ka jingkren na u Bah Wanhun Massar Executive Member, Elvis R.Marak CEC Member, Bah Diningroy President, Bah RS Khardewsaw Finance Secretary bad ka jingkren ai khublei na u Bah E.G War Publicity Secretary.

Ha kane ka sngi la pynlong ruh da ka cultural program ba kyrpang, kata ar tylli na West Khasi Hills Unit bad kawei na Garo Hills Unit.