Rai ka HSPDP ban mih noh na ka kynhun RDA: Paul Lyngdoh

Syllad | The Rising MeghalayaJuly 4, 2024

Ka Hill State People’s Democratic Party (HSPDP) ka la shim ia ka rai ban mih noh na ka kynhun Regional Democratic Alliance (RDA) hadien ka jingshah rem noh ha kane ka Lok Sabha ilekshon kaba dang shu dep.

Ia kane la pyntip da u nongialam ka UDP uba dei ruh u Myntri ka Sorkar Jylla u Bah Paul Lyngdoh ha ka 4 tarik mynta u bnai, da kaba pynpaw ruh ba ki don shibun ki daw halor ka jingshah rem u kyrtong ka RDA, kata da kaba ong ba dei na kane ka daw ba ka HSPDP ka la rai ban mih noh na ka RDA.

“Kumta kine ki dei ki daw kiba kongsan ban pynshong nongrim. Mynta ki don shibun ki bynta kiba ngi dang bishar bniah bad kawei na kine ka dei ruh halor ka jingshisha ba ngim shym la lah ban pynkhreh bha ia ka kynhun jong ngi ha katei ka rukom kaba ngi dei ban leh, bad ka jingshim rai jong ka RDA, ia ka kyrteng jong u kyrtong la pynbna die por, kata shi snem hadien ba u kyrtong ka seng VPP u la dep ban leit iaid ialap sha kylleng ki jaka,” ong u Bah Paul.

Haba kylli, u Bah Paul ula ong “Hooid, ki (HSPDP) ki la pynpaw ia ka jingbym don mon shuh ban dang bteng ban ia donlang bad ka RDA. “Kane ka dei ka jingpynpaw jong ka HSPDP, hynrei ngi donkam ban iakynduh bad iakren ia pynbeit halor kine kiei kie baroh,” u la bynrap.

Ka Seng HSPDP bad ka UDP ryngkat lang ki la pynieng da u President barim jong ka Seng HYC u Bah Robertjune Kharjahrin kum u kyrtong ka RDA ha kane ka ilekshon Lok Sabha kaba dang shu dep na Shillong parliamentary seat.

Lah ban kdew ba dang shen u President ka HSPDP u Bah KP Pangniang ula pynpaw ba ka party ka la shim ia ka rai ba kan mih iakhun noh ha la ka jong ha kane ka ilekshon MDC sha ka KHADC bad JHADC.