Rai ka JHADC ban shna thymmai iaka ophis ha Khliehriat

Syllad | The Rising MeghalayaOctober 26, 2024

Ban pynjan iaka jingshakri sha u paid nongshong shnong ka East Jaintia Hills District, ka Jaintia Hills Autonomous District Council (JHADC) kala rai ban shna thymmai iaka jaka treikam ka konsil kaba don ha Khliehriat West.

Kane kala wan long hadien ba ki MDC na ka thain East Jaintia Hills kila shim iaka sienjam bad rai ba dei ban pyntreikam ia ka ophis ka tnad kam khlaw kaba don ha Khliehriat. Kine ki MDC ki kynthup ia EM incharge CWD ma Phasmon Dkhar, EM ba dei khmih iaka political ma Finelyness Bareh, u EM incharge Stationery bad kiwei u ma Seibor Shadap bad u Deputy Chief Executive Member ka JHADC uba dei khmih ruh iaka tnad kam khlaw, u Ma Lasky Rymbai.

Ban pynurlong ia kane ka jingthmu, kine ki MDC kila hiar jurip iaka ophis ka tnad kam khlaw ha Khliehriat West haka 26 tarik u Risaw ban shim jingkhein iaka jinglong jingman kane ka ophis.

U Deputy CEM u ma Lasky Rymbai ula ong ka thong ka konsil ka long ban wanrah lang iaki tnad treikam ka konsil ha Khliehriat, ka headquarter ka East Jaintia Hills ha kawei ka iing khnang ban pynjan iaka jingshakri sha u paidbah ka thain.

Kane ka iing treikam ka dei jong ka tnad Forest bad la rai ban shna pynbha iaka hadien bala ieh iaka la bun snem, khnang ba u paidbah ka thain ruh un myntoi da ka jingdon kane ka ophis.

“Ym tang ban pynjan iaka jingshakri sha u paidbah, wat ka konsil ruh kan lah ban pynjanai iaka jingtreikam jong ka. Da ka jingdon ki nongtrei hajan bad ki tnad bapher bapher kan kyntiew ruh iaka jingpynmih khajna bad ban khanglad iaka jinglaitrud ka khajna konsil,” la ong u EM incharge ka CWD ma Phasmon.