Rai ka jingialang ka AJP-VPP ban thaw ia ka kynhun ‘RDF’ hapoh ka thain North East
Ha ka jingpyrshang ban thaw ia ka kynhun seng sain hima jong ki party riewlum ka thain Shatei Lammihngi (North East), ka Assam Jatiya Parishad (AJP) ha ka 22 tarik Naitung ka la pynlong ia ka jingialang kaba kongsan bad u MP ka Voice of the People Party (VPP) u Dr. Ricky Andrew J Syngkon ha ka nongbah Guwahati ban pyrshang ban pynkhlain ia ka jingiatreilang hapoh ka thain.
Kane ka jingialang ka la iakren halor ki mat kiba ktah ia ka jylla Assam bad Meghalaya, kumjuh ban wad bniah na ka bynta ban thaw ia ka “Regional Democratic Front” (RDF) na ka bynta ki jylla ka thain Shatei Lammihngi jong ka ri India.
![](https://www.syllad.com/wp-content/uploads/2024/09/JIT-Vacancy-823x1024.avif)
Ha kane ka jingialang la ia don lang u President ka AJP u Lurin Jyoti Gogoi, u General Secretary u Jagadish Bhuyan lem bad kiwei pat ki nongialam ba halor da ka jingthmu ban pynkhlain ia ka jingiatreilang hapdeng kine ki ar jylla halor ki mat kum ka roi ka par, ka jingkyntiew ha ka liang ka kolshor bad na ka bynta ka bha ka miat ha ka imlang sahlang.
“Ngi sngewkmen ban shim ia kane ka lynti jong ka jingiakren bad ka ka Voice of the People’s Party na Meghalaya,” ong u Lurin Jyoti Gogoi hadien ba la wai ka jingialang.
“Ka histori, ka kolshor, bad ka jinglong ki jaka kaba ngi iasam lang ka pynlong ia ngi ban iatreilang na ka bynta ban weng ia ki jingeh kiba ngi iakynduh hapoh ka thain,” ong u Gogoi.
Nalor kata ha kane ka jingialang ka la don ruh ka jingpynkup burom ia u MP ka Shillong u Dr Ricky Andrew J. Syngkon da u president ka AJP lem bad kiwei pat ki nongialam kane ka party.
Kumjuh kine ki party ki la mynjur ruh ban bteng ia ki jingiamir jingmut bad ban shim ia ki sienjam na ka bynta ban kyntiew ia ki jingtreikam ha ka synshar paidbah jong ka thain bad ban pynthikna na ka bynta ka lawei kaba phyrnai jong ki nongshong shnong ka Assam, Meghalaya bad ka thain North East hi baroh kawei.
![](https://www.syllad.com/wp-content/uploads/2024/07/VPP-AJP-jpg.avif)
Ha ka 18 tarik mynta u bnai ka AJP bad ka Citizen Action Party of Sikkim (CAPS) ki la pynbna ia ka jingiatreilang ban iatreilang na ka bynta ka jingmyntoi kaba kham khraw jong ki trai ri trai muluk ha ki jylla ka thain North East.
Ha ka jingialang kaba la long ha Hotel Gateway Grandway, Guwahati, ki nongialam jong kine ki ar tylli ki seng ki la rai ruh ban pyniaid lang ia ka rynsan na ka bynta ki seng sain pyrthei jong ka thain North East.
Leave a Reply