Rai ka jingialang KSU bad nongialam ban apil sha u DC bad NHAI ba sniew tasam ka surok NH6

Syllad | The Rising MeghalayaJuly 23, 2023

Ka Khasi Students’ Union (KSU) bad ki nongialam shnong ka Narpuh kila rai ban iakynduh shuwa ia u DC East Jaintia Hills District bad ki bor pyniaid ka National Highways Authority of India (NHAI) ban apil na ka bynta ban maramot iaka surok bah NH 6 naduh na Lumshnong shaduh sha Malidor.

Ia kane ka rai la shim haka jingialang kaba la pynlong haka sngi Palei ha ryngkat ki nongialam shnong bad ka KSU Narpuh.

Ka jingialang kala rai ruh ba hadien ka jingiakynduh ia u DC bad NHAI, lada ym mih soh mih sla ki nongialam shnong bad ka KSU kim shim da kiwei ki sienjam ban pynbor iaka sorkar ban shna iaka surok kaba la iehshrah mynta la bun snem khlem ka jingmaramot bad manla ka 1 KM ka surok ka dap da ki thliew ki syar kaba la kylla long kum ki pung um haka aiom lyuir..

Ka NH-6 ka dei ka surok kaba kongsan bha nalor ka pyniasoh iaka bynta ba sharum ka Assam, ka pyniasoh ruh iaka Mizoram, Tripura bad ka Manipur, hynrei ka leit ka wan mynta ka long kaba shitom naka jingsniew palat liam kane ka surok.