Rai ka JSU ban iatreilang bad kino kino ki seng ban dawa ILP, kyntu ruh ban wanrah iaka National Games ha rilum Jaintia

Syllad | The Rising MeghalayaNovember 25, 2020

Ka Jaintia Students’ Union haka 24 tarik Naiwieng 2020, hadien ka jingialang executive committee kala rai ban iatreilang bad kino kino ki seng ban dawa pyntreikam iaka ILP bad ban pyrshah ia ka CAA haka Jylla. Kawei pat ka mat ka dei ban dawa na ka sorkar jylla ban wanrah lang ia ka 39th National Games ha ri lum Jaintia.

Ka JSU da kawei ka sur kala rai ban dawa na sorkar jylla ban shimkhia ban ia kren noh mardor bad ka sorkar pdeng ban dawa ban pynlong aiñ noh mardor ia ka ILP hapoh ka jylla kaba la mynjur lang ki 60 ngut ki MLA hapoh ing dorbar thaw aiñ ban pass ia ka ILP resolution.

Ka JSU kyntu jur ia ka sorkar jylla hapoh ka jingialam u CM u Conrad Sangma ban ia kren biang bad ka sorkar pdeng ban sngap ia ka jingkwah ki paidbah ban pynioh ia ka ILP hapoh ka jylla.

Ka JSU ka kyrpad sha baroh ki paid ka bri u hynniewtrep bad sha baroh ki paralok sengbhalang bad sha ki political party ban ia tylli lang kawei ban dawa na ka sorkar jylla ba kan shim khia ban ia kren noh mardor bad ka sorkar pdeng ban pynurlong ia ka ILP kaba u paid ka bri u hynniewtrep ki lah ang nud lah slem.

U Jersom Shylla president ka JSU ula ong ba ka JSU kan ai ka jingiatreilang bad kino kino ki sengbhalang kiba wan shakmat ban dawa ia ka ILP bad ka seng ka long kaba la khreh ban mih shakhmat na bynta ka daw bah ka jaidbynriew bad ka seng ka dawa na ka sorkar pdeng ban pyllait ia ka jylla baroh kawei na ka aiñ CAA namar katba long mynta ka CAA ka dang ktah ia ka jylla namar kidon ki jaka ki bym hap ha ka schedule area.

U General Secretary JSU, u Treiborlang R Suchen u la ong ba ka JSU kala ong ba kan dawa ruh na ak sorkar Jylla ban wanrah iaka National Games 2022 da kaba pynlong ia kino kino ki jait ialehkai kiba iadei bad kane ka thain ban wanrah ruh iaka roi kaba par da kaba tei iaki jaka ialehkai. ula kyntu iaki nongmihkhmat ka thaiñ Jaintia ban pynsngew sha ka sorkar ban wan rah ia ka National Games hapoh ri lum Jaintia bad ula ong ruh ba shen kin kin sa leit ban kynduh ia u CM ban pynsngew bad dawa ban wanrah ia ka National Games ha ri lum Jaintia.