Rai ka KHADC ban pynmih ia ka thup jong ki Kur ki Jait kiba don hapoh Rilum Khasi

Syllad | The Rising MeghalayaMay 13, 2024

Ka Khasi Hills Autonomous District Council (KHADC) ka la rai ba shen kan sa pyllait ia ka thup ne list kaba iadei bad ki Jait ki Kur Khasi kiba hap hapoh u pud u sam jong ka Council.

Haba kren sha ki lad pathai khubor ha ka 13 tarik Jymmang, u Deputy Chief Executive Member (Dy CEM) ka Council, u Bah Pynshngain N Syiem u la ong ba ia kane ka rai la shim ha ka jingialang ba la khot pynlong da ka KHADC ha ryngkat ki dkhot nongmihkhmat na ki Seng Kur bapher bapher nalor ki khlieh nongsynshar hadien ba ka la mih ka jingiatai kaba jur halor ka mat kaba iadei bad ka jingkhein Scheduled Tribe bad halor ka bynta jong ki Seng Kur.

“Ngi la shim ia ka rai ban pyllait ia ka list jong baroh ki Jait ki Kur Khasi kiba hap hapoh u pud u sam jong ki 5 tylli ki District ka Rilum Khasi kiba hap hapoh u pud u sam ka Council, bad ngi la kyrpad ia baroh ki Kur bapher bapher ba kin phah ia ki jingtip kiba bniah sha ka Council khnang ba ki Kur ki Jait jong ki kin shah kynthup hapoh kane ka thup ne list,” ong u Bah PN Syiem.

Nalor kata u la ong ruh ba ha ka jingialang la iakren ruh halor ka jingdonkam ban wad la ki don ne em ki Kur ki Jait kiba la klet ne ki bym don shuh hashwa ban pyllait ia ka thup kaba khatduh jong ki Kur ki Jait Khasi kiba don hapoh u pud u sam jong ka Council.

U Dy. CEM u la ong ruh ba ka thong halor kane ka jingpynkhreh ka long ban pynbeit ryntih ha kaba iadei bad ka rukom pyniaid ia ki Kur ki Jait (Clan Administration) hapoh Rilum Khasi bad Jaitnia.

“Hadien ba la shim ia ki jingpynpaw bad ki jingai jingmut, sngi sngew ba ka long kaba donkam ban don ia ka thup jong ki Kur ki Jait Khasi hapoh u pud u sam jong ka Council khnang ba ia ka jingai syrnot yn lah ban leh ha ka rukom kaba dei,” u la ong.

Nalor kata u la ong ruh ba ka Council kan sa pynlong biang ia ka jingialang halor kane ka phang khnang ba baroh ki Kur ki Jait Khasi kin ioh ban ia don bynta lang.

Ha kaba iadei bad ka jingbatai uei u Khasi, u Dy. CEM u la ong, “Ngi la iakren ba kane ka bynta ka dei ban long katkum ka KHAD (Khasi Social Custom of Lineage) Act, 1997. Hynrei, watla katta ngi donkam ban iakren ia kane ka bynta kumba la pynpaw da kiba bun ki kynhun ba don bynta hashwa ban shim ia ka rai halor kane ka phang.

Na ka liang u nongialam liang pyrshah u Bah Titosstarwell Chyne u la ong ba ka Council ka sngewkmen shibun ba ki dkhot jong ki Kur ki Jait bnapher bapher kumjuh ki khlieh nongsynshar ki la kyrshan ia ka Lineage Act kumjuh ia ka jingpynbna ba dang shen ba la pynmih da ka Tnat Social Welfare ha kaba iadei bad ka jingai ia ki Scheduled Tribe Certificate.

Nalor kata u la kyntu ruh ia baroh ki Kur ki Jait Khasi ba kin phah ia ki jingtip kiba bniah khnang ba ka Council kan lah ban pynmih ia ka thup jong ki Kur ki Jait Khasi kiba don hapoh ka thain jong ka Jylla.