Rai ka KSA ban nym ailad ialap elekshon ki kyrtong MDC ka JHADC hapoh West Karbi Anglong District
Hadien ka jingshah khang lynti ka kyrtong jong ka seng Indian National Congress (INC) na Barato Mukroh Constituency, ka Kong Banikas Laban ha ki nongshong shnong ka Karbi ha Umkhyrmi, West Karbi Anglong District, ka seng Karbi Students Association (KSA) kaba don haduh saw kynhun ka la pynmih ia ka rai ban nym ai lad ia kano kano ka jingialap ne jingialang na ka bynta ka elekshon ki kyrtong MDC sha ka Jaintia Hills Autonomous District Council (JHADC) hapoh u pud u sam jong ka West Karbi Anglong District, Assam.
Kumba shu pynkynmaw, ha ka 7 tarik Rymphang, ki nongshong shnong ka Karbi ki la khang lynti ia ka Kong Banikas Laban bad ka kynhun jong ka ha ka por ba ka poi ha ka shnong Umkhyrmi bad ki Karbi ki kylli balei ki leit ialap elekshon na ka shnong jong ki kaba hap hapoh West Karbi Anglong District, Assam. Ki la ong ruh ia ka Kong Laban ba ka dei ban shim jingbit shwa na ki bor pyniaid jong ka West Karbi Anglong District shwa ba kan iaid lynti na ka shnong jong ki.
Ka Karbi Studentss Association (KSA) ka la rai ruh ba kan nym shah ia kino kino ki kali ban leit sha ki shnong Pnar hapoh West Karbi Anglong District na Meghalaya ne kiba mih na ki shnong Pnar hapoh West Karbi Anglong District na ka bynta ban leit ialap elekshon.
Ka KSA ka la buh jingkylli kumno ba ki nongshong shnong Pnar ki shong ki sah ha West Karbi Anglong District, hynrei ki leit ki thep vote pat sha West Jaintia Hills District ha ka por ba don elekshon sha Meghalaya.
Katei ka rai jong ka seng KSA hadien ba u kyrtong jong ka NPP u Ma Aiborlang Shadap u la pynlong jingialang elekshon ha ka 6 tarik mynta u bnai ha ka shnong Mowjem hapoh Block-I.
Ia katei ka jingialang la wan ringdur da ki lad pathai khubor na West Karbi Anglong District bad kitei ki lad pathai khubor ki la buh jingkylli ba kumno ki briew na Meghalaya ki ioh ban wan pynlong jingialang ne jingialap elekshon hapoh West Karbi Anglong District bad ki la buh jingkylli hato ka Karbi Anglong Autonomous Council (KAAC) kan leh eiei halor kane.
Kumba yn shu pynkynmaw hangne hadien ka jingpynbeit thymmai jong ki Konstituensi hapoh JHADC da ka Delimitation Committee, ka Shnong Mowluber, Psiar, Khatkasla bad kiwei de kaba ju hap hapoh Saphai Constituency kila shah pynkynriah noh sha Barato Mukroh Constituency.
Ki kyrtong iakhun elekshon ki hap ban leit lyngba ki shnong Karbi khnang ban kham jan ka jingiaid lynti na thain Mukroh sha ki thain Psiar Khatkasla ne na thain Psiar Khatkasla sha thain Mukroh. Lada ki iaid lyngba ka shnong Sahsniang bad Laskein ka jngai haduh 30 ne 40 kilometre.

Leave a Reply