Rai ka kynhun myntri ia ki tarik elekshon MDC, ap iaka jingmynjur Lat

Syllad | The Rising MeghalayaDecember 10, 2024

Ka kynhun myntri ka jylla ha ka 9 tarik Nohprah ka la rai iaki tarik ba la tyrwa ban pynlong ia ka elekshon sha ki ar tylli ki autonomous district council (ADC) ha Khasi bad Jaintia, ka ban mynjur da u Lat ka jylla u CH Vijayashankar.

Hadien ba la pynïaid ïa ka jingialang kynhun myntri, u Myntri Rangbah ka Jylla Conrad K Sangma u la ong, “Ngi la rai bad buh iaka tarik ban pynlong ïa ka elekshon MDC sha ka KHADC bad JHADC. Ia ka tarik bad baroh ki jingdonkam ha elekshon la pynbeit bad mynjur da ka kynhun myntri.”

Hynrei u la ong ba ia ki tarik ban pynlong ia ka elekshon ADC yn sa pynbna paidbah hadien ka jingmynjur jong u Lat.

“”Hooid kumba phi tip ia kine baroh ki hap ban ioh jingmynjur na u Lat bad kumta, shisien ba la mynjur da u Lat tang nangta ngi lah ban pynbna paidbah ia ka,” la bynrap u Conrad.

Haba kylli, u CM u la ong, “Ka kynhun myntri mynta ka la mynjur bad tyrwa ia ka ban mynjur da u Lat ka jylla jong ngi kumta ngi ap ia kata bad ynda ngi la ioh ia ka jingmynjur na u Lat, ngin sa pynbna bad pyntip paidbah iaka elekshon bad ki tarik kiba thikna .”

“Kan long kaba bakla ia nga ban ai tarik namar ngam lah ban pynkylla ia ka rai ban shim da u Lat. Tang ynda ngi la ioh ia ka jingmynjur na ka secretariat jong u Lat tang nangta ngi lah ban pyntip,”u la bynrap.