Rai ka MFA ban nym pynlong iaka Meghalaya Amateur League

Syllad | The Rising MeghalayaSeptember 12, 2023

Ka jingialang ka Executive Committee ka Meghalaya Football Association (MFA) kaba la long ha ka sngi Saitjain jong ka taiew kaba la dep, ka la shim ia ka rai ba kan nym bteng shuh ban dang pynlong ia ki prokram kiba dang sah ka lympung ialehkai Meghalaya Amateur League (MAL)

Kat kum ka khubor, la iathuh ba ka daw ka jingbym treh shuh ka MFA ba kan dang bteng ban pyniaid shakhmat ia ki prokram ba dang sah jong kane ka lympung, ka dei hadien ba ki kynhun ne klob ba iashim bynta, ki la pynpaw ba kim kwah shuh ban dang bteng ban ialehkai ha kane ka lympung, hadien ba ka rukom ban pyniaid da ka MFA ia kane ka lympung kam long kaba iaid beit kaba iaid ryntih, kaba bunsien kam juh lah ruh ba kan pynbiang ia ki madan ba kan pynialehkai ia ki prokram ba la buh.

Ka MAL ka dei ka lympung ialehkai ba la iohlad ban iashim bynta da 20 tylli ki kynhun, ia kaba la sdang ia ka naduh u snem ba la dep hynrei mynta la jan shisnem shiteng, ka MFA, kam shym la lah shuh ban pynlong tikna ia kane ka lympung, kaba man la ki kynhun ne ki team ba la ioh ban aireng ki la hap ba kin siew ym duna haduh 40 hajar tyngka kaba kynthup naduh ka bai register ia ka team bad register ia ki player.

Hynrei ym slem hadien ba la ioh ban sdang ia kane ka lympung, ba san kynsan, ki bor pyniaid ka MFA ki la sdang ban pynkylla noh iakane ka lympung da kaba la pynkhreh ban pynlong noh tang ha ki sngi kut taiew bad kumjuuh ha ki sngi shuti, kaba la sdang ban wanrah ia ka jingeh ia ki kynhun kiba wan ban iashim bynta, namar ba kamadan ba la pynkhreh ban pynialehkai ka long tang ka madan jong ka MFA Turf, Third Ground, Polo.

Kane ka jingpynslem ban pynlong beit shakhmat ia ka MAL, ka la sdang ba kan pynjlep ia kio team kiba la wan ban iashim bynta, bad ha kaba kut, ki la pyntip noh ha ka MFA, ba ki la rai ban nym treh shuh ban iashim bynta, bad ia ka pisa kaba ki la siew baroh, ka MFA ka dei ba kan pynphai noh sha baroh ki kynhun.

Kumta ha ka jingialang ka executive committee ba la long ha ka taiew kaba la dep, la shim ia ka rai ban pynkut beit noh ia ka MAL bad ka MFA kan ialeh ba kan pynphai noh wat ia ka pisa sha baroh ki klob bad katta ruh ka long hadien ba la dep ba kan khate pat ia ka pisa, kaba ka la dep ba kan pynlut  naka bynta ki jingialehkai kiba ka la dep ba kan pynlong shakhmat.

Haduh ka khyllipmat ba ka MFA kam shym la lah shuh ba kan pynlong ia ka MAL, ka kynhun ne ka team kaba don halor duh ka miej iakhein poin, dei ka kynhun ialehkai  ka Shillong Press Club.

Khnang ban ia shai pat mynta, hato kane ka rai ka Executive Committee ka MFA ban pyndam noh ia ka MAL kaba shong nia.

Nalor katta, ka MFA nalor ba  ka la tip bad iohi lypa ia ka jingbym don madan shuh ha nongbah Shillong, aiu pat ha lyndet ka jingjham madei ban rai kyrkieh ban pynlong ia ka MAL.

Ka jingkylli kaba shah eh hakhmat ka long hato ki kynhun ne team kin hun ba kin shim bad pdiang noh ia ka pisa kaba ka MFA kan khreh ba kan pynphai hadien ba ka la khate pat ia ki jinglut na ki jingialehkai ba la dep ban pynlong.