Rai ka MSOA ban pynlong ïa NE Olympic Games 2022

Syllad | The Rising MeghalayaDecember 11, 2021

Ka jingialang ba kyrpang ne ka special annual general meeting ka Meghalaya State Olympic Association (MSOA) kaba la long mynta ka sngi Saitjain ha Tirot Sing Indoor Stadium, ka la shim ia ka rai ba kan pynlong ia ka lympung bah ialehkai North East Olympic Games kaba 2, kaba la thmu ban pynlong ia ka ha u bnai Risaw jong u snem 2022 u ban wan.

Ka jingthmu ka MSOA ban pynlong ia kane ka lympung bah ialehkai ki jylla ka thain shatei lam mihngi ka long kum shi bynta ban ioh ban rakhe ia ka lyngkhuh snem ba 50 jong ka jingioh ia la ka jylla kaba pura.

Haba iakren bad u working president ka MSOA, u bah John F. Kharshiing, u la iathuh ba dei ha kane ka jingialang ba ki dkhot ka executive committee ka MSOA, ki la wan shakhmat ha kaban buh ia la ki almanak ialehkai jong u snem 2022 u ban wan ne ba tip kum ka ‘calender of events’, khnang ba kane ka jingpynkhreh ban buh sngi buh ia ka long kum shi bynta ban ioh ban pyntip sha ka sorkar jylla, ia ki prokram kiba kumno ba ki synjuk ialehkai ka jylla, kiba hap hapoh ka jingpeit bad khmih ka MSOA ki don ia la ki jong ki prokram ne ki lympung ba kin hap ba kin leit ba kin iashim bynta sha ki rynsan ne lympung ba long ha ka thain ne ha ka ri.

Ha ka jingshisha, ka MSOA ka la dep ha kaban pynkhie im biang ia ka lympung ialehkai Meghalaya Games, hynrei ha kane ka kynti kaba mynta, ia kane ka lympung bah jong ka jylla, yn pynsangeh noh shwa ia ka, da kaba la plie lad ia ki synjuk ialehkai jong ka jylla ba kin phai khmat da kaba pynlong ia la ki prokram ialehkai kum ki state championship, khnang ba kin ioh ia ka kabu ksiar ban jied ne ban sei madan ia la ki kynhun ialehkai ban iakhun sha ka NE Olympic Games.

Ki 14 tylli ki jingialkehkai ban pynlong ha kane ka lyumpung ki long Archery, Athletic, Badminton, Basketball, Boxing, Football (Kynthei Bad Shynrang), Judo, Karate, Shooting, Swimming, Table Tennis, Taekwando, Tennis bad Wushu.