Rai ka Shillong Contonment ban ai notis sha kiba shong beain bad pyndait CCTV ha Lum Survey

Syllad | The Rising MeghalayaMarch 22, 2025

Ka Shillong Cantonment ka la rai ban phah notis sha baroh kiba shong ba sah beain ha Lum Survey bad ruh ban peit bniah ia ki jaka kiba donkam ban pyndait ia ki CCTV khnang ban tehlakam ia ki kam sniew.

Ia kane ka rai la shim hadien ba ka Shillong Cantonment haka sngi Thohdieng ka la pynlong ka jingleit jurip ia katei ka jaka ha ryngkat ki bor district bad ki bor pyniaid shnong jong ka thain.

Haba kren sha ki lad pathai khubor, u Chief Executive Officer (CEO) ka Contonment u Ayush Maurya u la ong, “Ngi la pynlong ryngkat lang ia ka jingleit jurip. Ngi la dep ban ithuh ia baroh ki jaka kiba donkam ban pyndait ia ki CCTV.” 

“Kham bun, ngi la ithuh ia kito ki jaka kiba kiba ju jia ki kam beain bad tang hadien katto katne por ngin pyrshang ban pyndait noh kham kloi da ki CCTV,” u la bynrap.

Nalor kata u pyntip ruh ba ki don katto katne ki jaka ha kaba ki briew ki la shong la sah beain bad na ka liang ka Board kan sa pyrshang ban shimkhia halor kane ka bynta kumjuh.

Haba kylli u Maurya u la ong ba kin leh da kaba tyngeh pyrshah ia baroh kiba wan kyntur pud.

“Ngin sa phah ia ki notis bad ngin ujor da ka ejahar bad ngin sa shim ia ki sienjam pyrshah ia ki katkum ka ain,” u la kular da kaba bynrap, “Baroh ki nongshong beain ha kaba nyngkong kin ioh shwa da ka jingmaham ba ki dei ban mih noh. Katkum ka rehabilitation Act ngi donkam ban ai ia ki katto katne ka jaka bad ba ngi donkam ban iakren bad ka sorkar Jylla halor kumno ba ngin iarap ia ki.”

Nalor kata u la ong ba ki la ithuh ruh ia ki katto katne ki jaka kiba iadei bad ki jaka pynieng kali. “Ngi donkam ia ka jingiadon bynta jong u SP Traffic khnang ba ngin lah ban pynlong biang sa kawei pat ka jingjurip halor ki surok iaid kali.”

Katkum ka jingpynpaw ka jong u, u la ong ba ka jingpyndait ia ki CCTV kan don shisha ia ka bynta kaba kongsan ban pynthikna ban buddien ia ki kam beain baroh 24 kynta.

U la ong ba ka Cantonment kan khmih bniah ruh ban pyndonkam ia baroh ki lad ban pynkhuid ia kane ka jaka bad ban pyrshang ban pynlong kum ka lad kamai lyngba ka jaka pynieng kali.