Rai ka sorkar ban khang syndon iaka Mawmluh Cherra Cements Limited

Syllad | The Rising MeghalayaDecember 20, 2023

Ka sorkar jylla haka 19 atrik Nohprah, ka la ong ba ka la shim ia ka rai kaba khatduh ban khang noh shisyndon ia ka karkhana pynmih dewbilat kaba la rim tam ha ka jylla, ka Mawmluh Cherra Cements Limited (MCCL) namar ka jingbym lah shuh ban khie khlieh. 

Haba kren sha ki lad pathai khubor, u CM ka jylla u Conrad K Sangma u la ong, “Ngin hap ban shim ia ki sienjam ban khang noh syndon ia ka MCCL namar ngim shym lah shuh ban pyniaid namar ka jingbei pisa ka heh palat nalor ka 300 klur kaba la dep ban bei naduh kine ki 15 tylli ki snem kiba la leit noh.”

“Ngi la pyrshang ia kaba bha tam ban pynkhie im pat ia kane ka karkhana, hynrei namar ki jinglong jingman hapoh jong ka, kane ka la wanrah jingeh ia ki paidbah, ki nongtrei ki la mad jingeh, na ka liang ka sorkar kam shym la lah ban pyniaid shakhmat, kumta ka long kaba donkam ban shim ia ka rai namar ngin ym lah ban shu iai neh kumba ka long mynta. Kumta ngi la shim ia ka rai bad baroh ki kynhun kiba ia don bynta ba ngin hap ban khang khyrdep noh ia ka, hynrei yn leh ia kane da ka lynti bad lyngba ka jingiamir jingmut bad baroh ki kynhun bapher bapher ha ryngkat ki kyndon,” ong u CM.

Nalor kata u CM u la ong ruh ba ka sorkar ha ka jingshisha kala shim ia ka sienjam ban iapynbeit da ka jingiasngewthuh jingmut bad ki kynhun bapher bapher lem bad ki nongtrei bad “Ngi lah jan poi sha kaba kut bad ka rai ha ryngkat bad ki kynhun bad ki nongtrei ha kaba ngin pyntreikam noh da ka VRS bad ruh ha ka rukom jong ka jingiakhublei kti khatduh bad ki nongtrei ba pura jong ka MCCL.”

Kumjuh na ka liang u Conrad ula ong pat ba ka Sorkar kam pat ai ia ka rai kaba khatduh halor kane ka bynta bad ka dang pynkhreh mynta ia ki kyndon kiba dei ban pyndep na ka bynta ban khang noh ia kane ka karkhana.

Haba jubab ia ka jingkylli, u CM watla katta u la ong, “Ha ka jingshisha ngi kwah ban leh ia ka joint venture, hynrei kaba sngewsih ka long ba ngim shym la ioh satia ia ka jubab kaba biang. Kumba Nga ong ha kaba nyngkong ngi don laitylli ki lad, kata ka lad kaba nyngkong ka dei ia ka sorkar ba kan pynlut haduh jan kumba 150 klur ne kaba la jan kot sha ka T.200 klur ia kaba ngi shem ba ka long kaba shitom shibun na ka bynta jong ngi ba ngin lah ban leh.”

“Ka lynti kaba ar na ka bynta jong ngi ka dei ba ngin leh da ka joint venture bad kila pyllait ruh ia ka jingpynbna halor ka jingdon mon. Kila don katto katne ki kompani kiba wan hynrei kine ki kompani kim pat kot ia ka kyrdan kaba ngi sngew ba kin lah ban leh hok ia ka kam” ula ong haba pynpaw baka lynti ba khatduh eh ka dei ka rai lang bad ki kynhun bapher bapher ba ngin khang khyrdep noh ia ka kompani lada kut kine ki artylli ki lad. Ngi la ioh ruh ia katto katne ki kompeni kiba la wan hynrei kim pat kot satia ia ka thong kaba la buh kaba ngi sngew ba kin lah ban leh bad pyndep hok ia ka kam kumba ngi la khmih,” ong shuh shuh u CM.

Kumta ruh hadien ka jingiathir bniah bad baroh ki kynhun bapher bapher mynta baroh ngi la mynjur ba ka lynti kaba ai ka dei kaba biang eh ban pyniaid shakhmat ha kaba iadei bad kane ka bynta.