Rai ka sorkar ban kyrshan ia ka JHADC bad GHADC namar ka jingtyrkhong pisa

Syllad | The Rising MeghalayaFebruary 20, 2024

Ka sorkar jylla ka la shim ia ka rai ban ai ka jingkyrshan ia ki artylli ki Autonomous District Council ha Garo Hills bad Jaintia Hills kiba don hapdeng ka jingtyrkhong pisa kaba lam ruh sha ka jingbym lah ban siew thikna ia ki tulop jong ki nongtrei naduh kine ki khyndiat snem kiba la dep.

Haba kren sha ki lad pathai khubor haka 20 tarik Rymphang, u Symbud Myntri Rangbah ka jylla uba khmih ia ka Tnat District Council Affairs (DCA), u Bah Prestone Tynsong u la ong ba ka sorkar ka long lakloi ban aijingkyrshan ia ka GHADC bad JHADC na kane ka jingtyrkhong pisa kumba ka long mynta.

Kumba ka long mynta kine ki artylli ki ADC kim shym la lah ban siew thikna ia ki tulop sha ki nongtrei jong ki. Na ka liang ka GHADC kam shym la lah ban siew ia ki tulop jong ki nongtrei mynta lah lai snem kynthih. 

Ar taiew ai por ka High Court ia ka JHADC ban file affidavit bym pyntreikam iaka hukum pyllait tulop

“Ngi la bishar bniah na ka liang ka sorkar halor kane ka jingeh. Nga la dep ruh ban iakren bad u CM, bad na ka liang u CM ruh un sa kren ia kane ka mat bad ban sa shim ruh ia ka rai ha kane ka Dorbar Mangtyngka kaba mynta,” ong u Bah Tynsong.

La kine ki artylli ki ADC ki ioh ne em ia ki bhah kiba iadei bad ki khajna na ki marpoh khyndew, u Symbud Myntri Rangbah u la ong, “Kine ki dei ki kam kiba dang iaid shakhmat bad kam long kaba donkam ba man ka kut snem mang tyngka phin hap ban siew pynkhuid ia ki baroh. Ka shong ha ka jinglum bad hadien ha ka jingkhate bad ka jingpynbiang hangne hangtai yn sa pyllait ia ka pisa sha ki District Council.”