Rai ka sorkar ban pynsangeh shwa ia ka project ‘Skywalk’ ha Barik ban lait na jingkhapngiah

Syllad | The Rising MeghalayaJanuary 17, 2025

Ka sorkar jylla ka la rai ban pynsangeh shwa ia ka jingtyrwa ban shna ia ka ‘Skywalk’ project na Barik point, Shillong hadien ka jingioh pdiang ia ka kaiphod jurip bniah kaba pyni ba ka jingpyntrei ia kane ka project kan lam sha ka jingdheng kali kaba jur bha.

Haba pyntip i kane, u Myntri Rangbah ka Jylla u Conrad K Sangma ha ka 16 tarik Kyllalyngkot u la ong, “Ngi la pynsangeh shwa ia ka ‘Skywalk’ project, bad ka daw hi ka long namar hadien ka kaiphod jurip bniah ia kane ka kam la pyni ba ka jingpyniaid shakhmat ia kane ka project ha kane ka jaka kan wanrah ia ka jingdheng kali kaba jur ha kane ka surok.”

“Watl ngi la don lypa ia ka plan, hynrei ka rai ka long ba la ngin sdang ia ka kam bad mada ia ka jingkhapngiah ha ka shi snem ban wan lane shi snem shiteng lane ngin ap shwa tad haduh ba ngin da ioh ia kawei pat ka lynti ba ngin jam shakhmat.Kumta, ngi la rai ba na ka bynta ka bit ka biang jong ki paidbah, watla kane ka project ka dei kaba biang palat hynrei ka jingsdang ia kane ka project kan lam sha ka jingdheng kali kaba jur, kumta ngi la rai ban pynsangeh shwa shipor,” u la bynrap.

Katba halor ka project ban pynitynnad ia ka Wahumkhrah, u Myntri Rangbah u la ong ba ka sorkar ka la dep ban aiti ban pyntrei noh ia kane ka kam kaba kot kumba 30-40 klur.