Rai ka Sorkar ban pynthymmai ia baroh ki surok ba kongsan ha sor Shillong: Dy CM

Syllad | The Rising MeghalayaOctober 25, 2024

Ka Sorkar Jylla ka la shim ia ka rai ban siang rong thymmai ia baroh ki surok ba kongsan ha kylleng ki jaka jong ka sor Shillong.

Haba pyntip ia kane ha ka 25 tarik u Risaw, u Symbud Myntri Rangbah uba khmih ia ka Tnad Transport u Bah Sniawbhalang Dhar u la ong, “Ka Tnad PWD ka la pynkhreh ia ka jingmang pisa na ka bynta ban siang rong thymmai ia baroh ki surok kiba kongsan ha sor Shillong khnang ba ngin ioh ia ki surok kiba bha bad pynsuk ha ka leit ka wan.”

Kane ka jingshim rai ka la wan long ruh hadien ba ka Sorkar ka la rai ban ym pyntreikam satia ia ka smart road hapoh jong ka project Smart City hadien ba la shem ba kam long satia kaba iahap.

“Kane ka dei ka Smart City phase-II. Balei ba ngi la pynsangeh noh namar ki don katto katne ki jingeh, kane ka project kan ym lah ban iaid shakhmat. Hynrei, ha ka jaka jong kane ngi la pyrshang ban bujli na ka Sorkar Jylla da kaba pynthymmai da kaba siang rong ia baroh ki surok kiba kot kumba 40-50 km ha ki jaka sor,” u la ong.

Nalor kata u Bah Sniawbhalang u pyntip ruh ba un sa pan jingtip na ki ophisar halor ka jinglong jingman jong smart road kaba pulom ha Lachumiere bad lano yn sa plie noh na ka bynta ka jingpyndonkam jong ki paidbah.