Rai ka Sorkar Jylla ban kyntiew ia ka tulop jong ki nongtrei 108 da 4 Percent

Syllad | The Rising MeghalayaJuly 20, 2024

Ka sorkar Jylla ka la rai ban kyntiew noh ia ka tulop jong ki nongtrei 108 Emergency Service da 4 percent.

Haba pyntip ia kane ha ka 19 tarik Naitung, ka Myntri ka tnad ka Koit ka Khiah ka Kong Ampareen Lyngdoh ka la ong, “Ngi la mynjur ban iasoi biang ia kito ki kontrak bad ki nongtrei ka 108 bad hadien ka jingiamir jingmut la mynjur ban kyntiew 4% ia ka tulp jong ki namar kine ki dei kiba sahteng hapoh ka National Health Mission (NHM) jong ka tnad ka koit ka khiah”.

Nalor kata ka la ong ruh ba kine ki nongtrei haba sdang ka jingiasoi soskular bad ka NHM, kaba dei ka jingpynbeit ba shipor jong ka Sorkar ban pyniaid ia ka 108 Emergency ha Jylla, kila don shibun ki jingiasyllok bad jingiakren bad ki nongtrei 108.

Ka la ong ruh, “Namar ki la ia soi ia ka soskular bad ka NHM na ka bynta shi snem, kumta ruh kine ki soskular ki dei ban hap pynthymmai. Ka dei ka kontrak kaba shisien shi snem, kumta ngi hap ban pynthymmai ia baroh kine ki kontrak bad ki nongtrei kiba don ha ki kam bapher bapher.”

Kumjuh ka Myntri ka la pyntip ruh ba ka tnad ka la iakren ruh bad ki tnad bapher bapher na ka bynta ki jingai jingmut kiba donkam halor kane ka phang kaba iadei bad ka jingpyllait tender biang na ka bynta ban pyniaid ia ka 108 Emergency Service ha ka Jylla.

Shuh shuh ka Myntri ka pyntip ruh ba kala ioh pdiang ruh sa ia kawei ka jingthoh ba ki don pat sa kawei ka kynhun jong  ki nongtrei ka 108 ki bym pat hun satia ia ka jingpynkiew tulop kaba 4% halor ki nongrim bapher bapher.

Halor kane ka la ong, “Kam don jingmut satia ban iakren ia kane hynrei khamtam ia lai jait ki nongtrei-pilot, receptionist bad ERO-kine ki nongtrei kila iasoi ia ka soskular bad ka NHM ba shisnem, kila sdang da ka tulop kaba rit bha bad kane ka dei kaba hap ban pynbeit. Ngam tip la ngin lah ne em ban leh ia kata hynrei nga la ioh pdiang ia ka jingthoh ha ka 18 tarik Naitung, ngan sa pule ia ka” kala ong da kaba bynrap ba ia mynta hi, ngi la pynthymmai ia baroh ki jingiasoi soskular bad ki nongtrei ka 108 bad kane ka dei kaei kaei kaba ngi la hap ban leh kum ka sorkar.”