Rai ka SSA ban nym pynlong iaka lympung ialehkai phutbol mynta ka snem

Apporlet ShabongJune 28, 2020

Ka  Shillong Sports Asociatiation (SSA), ka la shim ïa ka rai  ka jong ka bad kata ka long ba baroh ki lympung ïalehkai kiba dei ban long jong kane ka samoi ïalehkai kaba mynta u snem, la rai ban nym pynlong shuh noh shi syndon ïa ki.

Ka daw bah jong kane ka rai ban nym pynlong shuh ïa baroh ki division ïalehkai mynta ka samoi, ka la wan hadien ba kum ka jylla ryngkat ka ri bad satlak jong ka pyrthei, ki la mad ïa ka jingma kaba khraw namar ka jingwan ban lyngshop jong ka khlam jingpang Covid-19 ne Coronavirus.

Ïa ka rai jong kane ka jingpynangeh noh ïa baroh ki lympung ïalehkai, la shim ïa ka lyngba ka jingïalang ka Tournament Committee, kaba la long ha ka taiew.

U Hony Secretary jong ka SSA u bah S.S Rapthap, u ïathuh ba ka daw hi kaba pynlong ïa ka tournament committee ban nym pynlong shuh shi syndon ïa baroh ki division ïalehkai mynta ka snem ka dei na ka jingbym pat shah jong ki bor sorkar ban pynlong ïa kino kino ki jingïalehkai, ïa kaba kane ka rai, haduh mynta mynne ka dang treikam bad bym lah satia ban tip haduh lano yn weng iaka.

Kat kum ka almanak ïalehkai jong ka SSA ha man la ki aiom, ka juh sdang shwa ruih da ka kam ban renew ïa ki affiliation, bud pat sa ka Inter Club Transfer of Player, kiba long ki artylli ki kam kiba kongsan tam ba ka SSA ka juh pyndep, hadien kane, ka sa buh ryntih pat ïa baroh ki prokram ïalehkai kaba sdang shwa da ka U-18 Premier League, bud pat sa ka jingpynlong ïa kiwei kiwei pat ki division ïalehkai naduh ka Fourth, Third, Second, First bad khamtam  ka lympung ïalehkai kham pawnam ha ka jylla ka Shillong Premier League ne ka SPL. Lada shu ïa shim kyllum tang hapoh ka shi samoi jong ka jingïalehkai, ka SSA ka don da ki spah tylli ha ka shi samoi ka jong ka.

Hynrei ka mat kaba kham ktik eh ïa ka SSA ka long ba wat lada ka por ka la ailad ïa ka phutbol ha ka jylla ban lah ban sdang biang ïa ka, hynrei ka shieptieng ïoh ba mynta hi ka samoi yn nym lah ban pyndep lut ïa baroh ki league ne ki division ki jong ki, kaba da kylla kan kan ktah pat ïa kata ka rai jong ka jingïakiew ne hiar (relegation) jong ki kynhun ne klob na kawei ka division sha kawei pat.

Kumta haba la pynshong nongrim bha ïa kiei kiei baroh, da kawei ka sur ka rai na ka tournament committee lyngba ka jingïalang kaba mynta ka taiew ka long kan bha beit ban shu pynsangeh lut ïa baroh ki lympung ïalehkai naka bynta kane ka samoi jong mynta ka snem.