Rai ka SWS-EJH ban pynshai paidbah ban pynneh pynsah ia ki mrad ki mreng bad ka mariang

Syllad | The Rising MeghalayaDecember 2, 2024

Ka Synjuk Waheh Shnong (SWS) East Jaintia Hills District ka la shim ia ka rai ban sdang ia ki sienjam ban pynshai sha ki paidbah nongshong shnong jong ka district halor ka jingkongsan ban pynneh pynsah ia ki mrad ki mreng bad ia ka mei mriang lyngba ki prokram jingpynshai bapher bapher.

Ia kane la pyntip da ka Synjuk lyngba ka shithi ba la ai sha u Deputy Commissioner, East Jaintia Hills District, ha ka 29 tarik u Naiwieng.

Kane ka shithi ka la ong ba ka Synjuk kan pynlong ia ki prokram pynshai paidbah halor ka jingkongsan ban pynneh pynsah ia ki mrad ki mreng kiba don ha ki jaka khlaw jong ka district bad ruh ban pynneh pynsah ia ka mei mariang khnang ba kane kan pynshlur ia ki briew ba kin noh synniang ha ka ban iada ia ka spah mariang kiba hiar pateng.

Ka shithi ka pyntip ruh ba ka Synjuk ka don ia ka jingthmu ban pynlong ia ki workshop bad seminar halor ka jingsumar bad aijingiada ia ki mrad khlaw bad kiwei pat ki jingthaw ba im, ki mat kiba iadei bad ka mariang bad ki jingleit jngoh ia ki mrad ki mreng bad ki jingdon jingem ha ka spah mariang.

Ka Synjuk ka pyntip ruh ba ka don ia ka jingangnud ban pynlong ia ki prokram pynshai paidbah halor ka jingktah ha ki jingtreikam jong u khun bynriew ia ka mei mariang.

Ki la ong ruh lyngba ka jingsam ia ki tiar pynshai paidbah kum ki kot lyngkdop, ki poster bad kiwei pat, bad lyngba ka jingiatreilang bad ki skul bad college kan iarap shibun na ka bynta ban lah ban pynurlong ia kane ka jingthmu.

Dawa tuklar ka Synjuk Waheh Shnong EJH ia u DC halor ka jingkiew ka bai bording ilektrik