Rai khang shisyndon iaka jaka bret ñiut ka Jowai Municipal Board ha Thadmusem

Syllad | The Rising MeghalayaJanuary 22, 2022

Ka jingialang kaba long ha Nongkhroh haka sngi Saitjain kala rai ban khang shisyndon iaka jaka bret ñiut ka Jowai Municipal Board (JMB) ha Thadmusem.

Ha kane ka jingialang la iadonlang ki nongialam shnong Nongkhroh, Larnai, Sohphoh, Thadmusem, ki dkhot ka HITO bad kiwei kiwei.

U paidbah nongshong shnong da kawei ka sur u la shim rai ban khang iaka jingbret ñiut ka JMB ha Thadmusem kaba don hajan ka shnong Sohphoh, West Jaintia Hills District.

U Chairman jong ki Saw Shnong u Ma Adrin Dkhar ula pynrem jur iaka Jowai Municipal Board bad ula kynnoh ba kane ka jingbret ñiut ka JMB ka dei ka jinglehbor bad ka jingiuhroit ia u paidbah ka thain.

U Ma Katbanbiang Lamare president Elaka Nartiang Welfare Organization ula dawa na ka sorkar bad u Ma Sniawbhalang Dhar uba long u MLA ka thain bad u Myntri Pynroi Sor ban pynkynriah noh ia kane ka jaka bret ñiut khnang ban wanrah iaka shongsuk shongsain haka thain baroh kawei bad ban lait na ka jingshah ktah ka mariang bad ki jingri jingdup.