Rai khangdam ka bor shnong Khanduli pyrshah iaki nong Karbi ha khappud Assam Meghalaya

Syllad | The Rising MeghalayaMay 9, 2023

Hadien ka jingkhang ban leit leit rep leit riang la palat ar taïew, ka Dorbar Shnong Khanduli ka la rai ban khang markylliang da kaba khang pyrshah iaki nong Karbi kiba shong ba sah ha khappud Assam Meghalaya ban leit ban wan lyngba ka shnong Khanduli.

Ia kane ka rai ka dorbar shnong Khanduli kala shim ha ka jingialang kaba long haka sngi ba Ar ha madan football ka shnong Khanduli.

Haba kren bad ki nongthoh khubor, u waheh shnong Khanduli u ma Yooshida Nongspung ula ong ba kane ka rai kan neh tad haduh ba ki shnong Karbi kiba don haki jaka leit rep leit riang ki nongshong na Khanduli bad ki shnong ba marjan kin ailad biang ïaki nongshong shnong Khanduli ban rep ban riang bad ban shongsuk shongsaiñ.

Ki spah ngut ki nongshong shnong kiba la wan shim bynta haka Dorbar ki la pynpaw ïaka jingeh jong ki na kadaw bym ïoh leit rep leit riang sha ki lyngkha ki hali jong ki kiba don ha shnong ba shong ba sah da ki nong Karbi.

U Waheh Shnong Khanduli u Waheh Shnong u ma Yooshida Nongspung ryngkat u Chairman shnong u ma Niwal Challam kila ong ba ki Karbi kila khang ïaki nongshong shnong ka Khanduli ban leit rep leit riang shaki hali pynthor jong ki, kiba don haka shnong Myn-i, Stonglapar, Artiang Sanphaw bad kiwei kiwei ki jaka rep jong ki.

“Dang haki khyndiat sngi, ki nongrep ka shnong Khanduli kila mad ruh ïaka jingshah thang ki ïing trep jong ki ba don haki lyngkha rep bad ki la shah maham ruh haki nong Karbi kiba kah dur khmat ïalade,” la ong u ma Yooshida Nongspung.

U waheh shnong ula bynrap ba dei halor kane ka nongrim, “Ka Dorbar shnong Khanduli ruh ka la rai ban khanglad ïaki nong Karbi ban wan lyngba ka shnong Khanduli bad khanglad ruh ïaka khaïi pateng jong ki lyngba ka Khanduli katba kim ailad ban rep ban riang u paid Khasi Pnar bad poi sha ka jingiasuk.”

Ula kyntu ïaki marjan shnong bad ka Khanduli ba kin ïatreilang bad ka Dorbar shnong da kaba sangeh ka jingleit thied ïaki mar ki mata jong ki nong Karbi lyngba ka shnong Khanduli.

U Chairman shnong u Niwal Challam ula ong ka jingkhang jong ki Karbi ban leit rep leit riang ka long ka jingduh nong kaba khraw ïaki nongshong shnong ka Khanduli namar 50% ki nongshong shnong Khanduli ki don ïaki jaka rep haki shnong ba shong ba sah ba bun ki nong Karbi. “Lada ki nong Karbi ki kloi ban poi sha ka jingïasuk ngi ruh ngi kloi ban wan sha ka jingïasuk”, la ong u chairman shnong.