Rai ki ar shnong ban pynneh iaka shongsuk shongsaiñ ha Mowkaiaw Constituency

Syllad | The Rising MeghalayaMarch 4, 2019

JOWAI: Mynta ka sngi ka kynhun jong ki nongïalam shnong na Mowkaiaw bad Mowtyrshiah ryngkat bad u MDC thymmai ka Mowkaiaw Constituency kila lum jingialang ban tem ïaka jingïakynad kaba la ktah iaka shongsuk shongsaiñ ka shnong Mowkaiaw na ka kam elekshon MDC.

Kine ki nongialam shnong ka Mowkaiaw, Mowtyrshiah bad MDC kila lum jingialang hadien ba bun ngut ki khynnah skul na Mukhap, Mowtyrshiah kila pep skul. Nalor kata ki nongshong iew na Mukhap Mowtyrshiah ruh ki khlem leit iew leit hat wat la kadei ka sngi iew Mowkaiaw.

Ki nongialam shnong bad u MDC ban lait shah ktah ki khun ki kti jong ki, kiban iakhun eksam Matrik kaban sdang lashai, kaba ka centre kadei ha Mowkaiaw kila shimkhia ban khot ia kane ka jingialang ban pynbeit hapdeng para nongialam shnong ban pynneh iaka shongsuk shongsaiñ.

Ha kane ka jingialang la ïadonlang u Ma Loving Laloo, Waheh Shnong Mowkaiaw, u Ma Hamly Dkhar, Waheh Shnong Mowtyrshiah bad kiwei kiwei ki dkhot shnong jong ki ar shnong ha kaba la iakren pynbeit  bad la shim iaka rai ban pynneh ïaka shongsuk shongsaiñ bad ban long kumba julong ban iaid ieng da kaba suk ba sain na kawei ka shnong sha kawei.

Na kaliang u MDC ba thymmai u Ma Winning Garland Sungoh ula kyntu ia baroh ki nongshong shnong ban long jai jai bad ban pynneh iaka shongsuk shongsain bad ban klet ïa kiei kiei baroh namar ba kala elekshon kala kut bad khot wer ia baroh ban iatreilang ban wanrah iaka roi ka par haka thain Mowkaiaw.