Rai ki nongshet ja sngi khynnah skul ban weng iaka jingiakhih haka jingialang kaba long ha Lumtiniang Mowtyrshiah

Syllad | The Rising MeghalayaNovember 5, 2023

Ki nongshet ja sngi ha ki skul bapher bapher jong ka Jylla kiba don hapoh ka shatri jong ka Union of Cook cum Helpers PM POSHAN Meghalaya (UCCHPM Poshan) ki la weng noh iaka jingsangeh shet ja sngi bad kin sdang ban leit shet ja haki skul bapher bapher naduh 7 tarik Naiwieng.

Kane ka jingsangeh shet ja sngi haki skul bapher bapher ka la sdang naduh ka 16 tarik Risaw (Risaw) namar ba ka sorkar kam siew iaka bainong jong ki kaba sah naduh u bnai Naitung (July), Nailar (August) bad Nailur (September) mynta u snem.

Iaka rai weng sangeh treikam, la shim haka jingialang 4th General Meeting kaba la long ha u Lumtiniang, Mowtyrshiah West Jaiñtia Hills Districts haka 3 tarik Naiwieng.

Iaka jingialang la pyniaid da ka Chairperson ka Kong Phiioris Syngkon President Laskeiñ Block bad la ioh ka jingkren pdiang na ka Kong Lamjingieid Lapasam General Secretary Laskeiñ Block haka jingdonlang u Bah OB Kurbah Senior Incharge Consultant, u Bah Asoo Suchiang PM Poshan, u Bah K L Pariat Adviser AJMDMWU, u Waheh Shnong Mowtyrshiah u Bah Satellite Lapasam  bad ki spah ngut ki nongshet.

U kongsan u Bah OB Kurbah haka jingkren ula ong ba na ka liang ka ophis jong u kan ialeh katba lah ban pynkloi iaki kam kiba iadei bad ki nongshet ja sngi bad ban pynbeit iaka rukom pyniaid iaka PM Poshan ha Meghalaya.

Ula pynkynmaw ba ki nongshetja sngi ba ki bam kin dei ban long kiba khuid bad ula iaroh ruh iaka seng ki nongshet ja sngi kaba kloi ban iatreilang bad ka sorkar. Nalor kata ula ong ka PM Poshan lane ka Mid-Day Meal kadei ka skhim kaba bsa iaki longiing bad pyllait na ka jingiap thngan bad ban pynioh iaka jingbam ba tei iaki khynnah.

Ha kaba iadei bad ki nongshetja sngi ula ong ba kidei ki rishot jong ka PM Poshan bad lyngba jong ki, ka PM Poshan scheme ha Meghalaya ruh kala iaid shakhmat.

Ha kane ka jingialang u Jerry Anderson Suting ula pynsngew iaka report treikam jong ka seng naduh u snem 2021 haduh u snem 2022. Katba iaka Audit report la pynsngew da ka Secretary Kong Joycifull Lypon.

Ka Kong Banalis Syiem President Union of Cook cum Helpers PM POSHAN, Meghalaya Shillong ha kane ka jingialang kala pynbna paidbah ïa ka rai jong ka CEC ka Union ban sdang ban leit Shet Ja biang sha School naduh ka 07/11/23, ïa kane rai la shim hadien ba ka Sorkar Jylla ka la siew ïa ka pisa honorarium kaba tang Ar hajar tyngka shibnai haduh u bnai Nailur 23.

Ka Union kala kyntu iaka sorkar jylla kan siew lut ïaka bai bylla kynthup ia u Oct bad November hashwa ka Christmas. Kumjuh ruh ban lait na ka jingpyndonkam da ki dieng u rnga bad kaba la ktah jur ïa ka koit ka khiah ki Nongshet Ja, ka Sorkar ka dei ban hukum naduh u bnai April ’24 ba dei ban pyntreikam da ka LPG ha man ki kamra Shet Ja ha school ha baroh ka Jylla khnang ba ka jingialap jingthung dieng kanlong kaba nongrim ban pynneh pynsah iaka mariang.

Ha kane ka sngi la jied ruh iaki nongshet ja sngi ka AJMDMWU. Ki nongkitkam bathymmai ki long u President Jerry Anderson Suting, Vice President Biiola Iakai, General Secretary Joycifull Lypon, Assistant Secretary Arkini Lytan, Treasure Rimika Chalam.