Rai ki nongtrei SSA ban bteng ia ka jingiakhih ba pulom ka jingiakren ka Rationalisation Committee

Syllad | The Rising MeghalayaAugust 4, 2024

Ka All Meghalaya SSA Non-Teaching Staffs Association (AMSSANTSA) ha ka 2 tarik Nailar kala pynpaw ka jingbym hun ia ka jingmih na ka jingialang jong ka Rationalisation Committee ban iathir bniah halor ka jingtyrwa ban pynkiew bad pynbeit ia ka tulop jong baroh ki nongtrei Samagra Shiksha (Non-Academic) ha kaba kila shim ia ka rai ban bteng ia ka jingiakhih kaba khlem kut por tad haduh ba ka sorkar kan kloi ban mynjur ban pynkiew ia ka tulop kaba 80%.

Kane ka jingiakhih ba khlem buh por jong ki nongtrei SSA mynta ka la kynjoh sha ka saw sngi haka Sngi Saitjain ha kaba ki la rai ban bteng ia ka jingiakhih tad haduh ba ka Sorkar Jylla kan pynurlong ia ka jingdawa ka jong ki.

U MLA ka Seng VPP na Mawlai u Bah Brightstarwell Marbaniang u dei uwei napdeng ki katto katne ki nongialam sain hima bad ki Sengbhalang kiba la pynlong ka jingleit iakynduh ia kine ki nongtrei SSA kiba pynlong jingiakhih ha madan Malki ban pynpaw ia ka jingkyrshan ia ka jingdawa ka jong ki ia ka jingsiew kaba mar kumjuh na ka bynta kajuh ka kam.

“Ngi pynpaw ka jingsngew bynniaw halor ka jingmih na katei jingialang jong ka Rationalisation Committee. Ka jingiakren kam shym la poi shano shano ruh, kumta ka la long tang ka jingpynlut por”, la ong ka president ka AMSSANTSA ka kong Jennyfer J Synrem hadien ba la wai katei ka jingialang.

Kumta, ngi la rai ban bteng ia ka jingiakhih da kaba shong kyllain mungor kaba khlem buh por tad haduh ban da urlong ki jingdawa jong ngi,” kala ong haba pyntip ba ka jingialang kaba ar jong ka committee kan long ha ka sngi Palei jong ka taiew ban wan.

Ka jingpynbna paidbah ha kaba iadei bad ka committee kaba kynthup ia 20 ngut ki dkhot, kaba la khlieh da u Commissioner & Secretary u Vijay Kumar Mantri la aiti da u Myntri Rangbah ka Jylla Conrad K Sangma sha ka kynhun jongka All Meghalaya SSA Non-Teaching Staffs Association (AMSSANTSA) hadien ka jingialang kaba la long ha ophis treikam jong u Myntri Rangbah, ha ka 1 tarik mynta u bnai.

Kila don palat 1200 ngut ki nongtrei bym dei ki nonghikai hapoh ka SSA kiba la pynlong ia ka jingiakhih shong kyllain mungor khlem por ha madan Malki hadien ba kila kyntait ïa ka rai jong ka sorkar jylla ban pynkiew ia ka tulop jong ki kaba 25%. Ki nongtrei kiba pynlong ia ka jingiakhih kila dawa ban pynkiew tulop da 80% ryngkat bad 2% katkum ka jingtrei slem ha ka kan bad ban pynkiew 5% man la u snem.

Ka president ka la ong ruh, “Ka nongrim kaba ngi ng, ka long lada ki pynslem shuh shuh, ngin ym weng noh ïa ka jingïakhih jong ngi. Kumta ka sorkar ka dei ban shim rai mardor khnang ba ngin lah ban leit phai noh sha la iing. Ngi pynpaw shai ba ngim sngewtynnad ban pynlong ia kaba kum kane ka jingiakhih.”

Haba batai halor ki 7 tylli ki Term of Reference (ToR), ka jingpynbna paidbah ba la pynmih da ka tnad pule puthi kala ong, ba la pynkhamti ha ka komiti ia ka jingkitkhlieh ban bishar bniah ia baroh ki jingtyrwa kiba la ioh pdiang haduh mynta kiba iadei bad ka jingpynkiew ia ka tulop jong baroh ki nongtrei ki bym dei ki nonghikai jong ka SSA.

Nalor kata ka la ong ruh ba ka komiti kan pule bniah ia ki rukom siew ha ka imlang sahlang ha ka jylla Meghalaya bad kan buh ruh ia ka jingkdew ia ki rukom siew ba la bud ha kiwei pat ki jaka pule bad nalor kane, ka komiti kan pule bad ai jingmut ia ki sienjam ban pynduh ia baroh ki jingbym iahap ha ki jingsiew ha ki kyrdan bapher ha kylleng ki District bad ki Block.

“Ka komiti kan bishar ruh ïa ki jingtyrwa kaba la ïoh ha kaba ïadei bad ka jingpynkiew man la u snem ïa kum kine ki nongtrei. Ka komiti kan pyrkhat ha kaba iadei bad ka jingtrei slem ia ka kam ban pynbeit ia ka tulop jongki. Ka komiti kan ai ruh ia ki jingai jingmut bad ki jingbthah kiba iadei bad ka jingpynbeit ryntih ia ki kam ha ki kyrdan bapher bapher. Ka komiti kan pynthikna ba ïa ki kyndon bad ki jingbthah ba la pynmih da ka tnad pla tyngka na ka por sha ka por dei ban bud ryntih” bynrap ka jingpynbna paidbah.