Rai ki paidbah ka Mawkynrew ban ym ailad ia ka Ramakrishna Mission ban shna skul ha madan ialehkai

Syllad | The Rising MeghalayaJanuary 22, 2025

Ki nongshong shnong ka Mawkynrew bad Mawlein hapoh ka shatri jong ka ‘Sur Paidbah jong ki ar Dorbar Shnong’ ha ka 21 tarik Kyllalyngkot ki la ieng skhem ha ka nongrim ban ym ailad ia ka jingthmu ban tei ia ka skul jong ka Ramakrishna Mission ha Mawkynrew, East Khasi Hills.

Kane ka la wan long ruh shi sngi hadien ba ka jingiakhih kaba la pynmih ia ka huri hura kaba jur namar kane ka mat kaba la lam ruh sha ka jingmynsaw jong ki hynriew ngut ki briew kaba kynthup ia sawngut ki pulit kynthei, ha kaba la hap ban pynjari da ka korphiw ban khanglad na ka jngiakynad kaba lah ban nangjur shuh shuh ha kane ka shnong.

Kane ka la wan jia ruh hadien ba ki nongshong shnong ki la kynnoh ba u Acting Sordar lem bad ki briew jong u ki la aiti sop sop ia ka jaka kaba dei ka madan football Umjar sha ki bor pyniaid jong ka Ramakrishna Mission na ka bynta ban tei ia ka Iingskul, kata watla ia kane kajuh ka jaka la dep ban aiti sha ka Mawkynrew Sports Cub.

Haba kren sha ki lad pathai khubor ha Shillong Press Club u Sordar barim ka shnong Mawlein u Bah Phrangstarwell Wankhar u la ong ba ki nongshong shnong ka Mawkynrew bad Mawlein kim long pyrshah ia ka jingthmu ban tei skul, hynrei pyrshah ia ka jingthmu ban tei ha kane ka madan Umjar namar kane ka dei ka jaka ba la ai sha ka Mawkynrew Sports Cub.

U Bah Wankhar u la kynnoh ruh ba une u Acting Sorkar bad ki briew jong u ki la iaid lait ia kine ki artylli ki Dorbar Shnong bad ki nongshnong shnong da kaba aiti sop sop ia kane ka jaka sha ka Ramakrishna Mission ban tei ia ka skul.

“Ngi donkam ruh ia ka skul ban kyntiew ia ka pule puthi ha ka thain bad ha kajuh ka por ngi donkam ruh ia ka madan football, hynrei kane ka jingpyrshah ban tei ia ka skul jong ka Ramakrishna Mission ka dei namar ba ia kane ka skul la tei ha ka jaka ba la ai sha ka Mawkynrew Sports Club” ong u Bah Wankhar.

Nalor kata u la ong ruh ba kane ka jaka ha Madan Football Umjar ka dei jong ka Raid kaba kynthup ia ka Mawkynrew bad Mawlein ia kaba la aiti sha ka Mawkynrew SC naduh ki snem 2013.

U Bah Phrangstarwell u la kam ruh ba ki don ia ki sakhi sakhi ban pynshisha ba ka jaka ba u Acting Sordar u ai sha ka Ramakrishna Mission kam dei ha ka Madan Umjar hynrei ka jingtei ia ka iingskul pat ka la kyntur pud sha kane ka madan.