Rai ki pulit ban thwet jur ia ki runar ba pyrshang thombor ia ki Police Station

Syllad | The Rising MeghalayaSeptember 7, 2024

Ki Pulit ka East Khasi Hills ki la rai ban pynlong ka jingthwet kaba jur ia ki briew kiba donkti ha kaba pyrshang thombor bad kawang petrol bom ia ki police station.

Ka Jylla ka la sakhi ia ka jingshah thombor ba khah khah jong ki police station mynta u snem ha kaba ka jingthombor kaba dang shen eh ka la jia dang ha kine ki khyndiat sngi ba la dep pyrshah ia ka Rynjah Police Station.

Kumjuh ka Mawlai police station, Sadar Police Station bad ka Laitumkhrah Police Station ruh ki la shah pynkylla sohpdung ha ki nongthombor dang ha u bnai Iaiong bad Jymmang ba la dep.

U Superintendent of Police ka East Khasi Hills u Bah Sylvester Nongtnger haba jubab ia ka jingkylli u la ong ba halor ka jingjia kam thombor hapoh Rynjah PS ki pulit ki la register case bad ka jingtohkit ka la iaid shakhmat ha ryngkat ka jingpynthikna ban ioh kem ia ki briew kiba donkti.  U la ong ruh ba ki pulit ki la shim ia ki sienjam kiba tyngeh halor kine ki jingjia shah thombor ki police station.

“Ha kaba iadei bad ka Laitumkhrah PS case, ki runar ki dang bteng ban don hapoh along ha kine ki 4-5 bnai,” ong u SP haba phah ia ka khubor kaba tyngeh pyrshah ia ki nongleh kam bymman. Ki pulit kin leh da kaba tyngeh ia ki. Ngi lah ban ym ioh iaphi mynta lane lashai hynrei ngin iai bteng ban thwet man la ka sngi.”

“Kum ki pulit, ngin hap ban leh ia la ka jong ka kamram. Kino kino kiba leh ia ki kam bymman ngin thwet bad behthong ia ki,” u la bynrap. Nalor kata u Bah Sylvester u la ong ruh ba ka Tnad pule ka la pyrkhat ruh halor ka thong kaba hakhmat eh ban pyndait noh da ki CCTV ha baroh ki police station.