Rai ki samla pule NEHU ban bteng ia ka jingshah thngan kat bym pat weng ia u Vice Chancellor

Syllad | The Rising MeghalayaNovember 15, 2024

Ki artylli ki seng jong ki samla pule ba pynlong jingiakhih ha ka skulbah North Eastern Hill University (NEHU) ki la rai ban bteng ia ka jingshah thngan ba khlem pud tad haduh ban da pynhiar shuki noh ia u Prof PS Shukla kum u Vice Chancellor.

Ia kane ka rai la shim ruh wat hadien ba ka Ministry of Education ka Sorkar Pdeng ka la thung da ka Inquiry Committee kaba kynthup ia ki arngut ki dkhot na ka bynta ban pynlong ia ka jingtohkit halor ki jingkynnoh pyniaid bakla ia ki kam ki jam bad halor ki jingpulom ha ki rukom treikam jong ka skulbah NEHU.

Kane ka jingiakhih jong ki samla pule ka dei kaba la lamkhmat da ka North Eastern Hill University Students’ Union (NEHUSU) bad kyrshan da ka Khasi Students’Union (KSU-NEHU Unit) kaba la jam mynta sha ka sngi kaba shiphew.

Na ka liang u General Secretary ka NEHUSU u Toniho S Kharsati ula ong, “Ngi la ioh pdiang ia ka jingpynbna na ka Ministry of Education kaba la pynbna halor ka jingthung ia ka Committee ban leh ei ei halor ki mat kiba ngi la pynsngew. Hynrei, kane ka rai kam shym la iaid katkum ki jingdawa ki jong ngi ki samla pule. Ka jingshah thngan ka jong ngi naduh ka sngi kaba nyngkong ka dei kaba thmu khamtam eh ban weng noh ia u VC, bad ngin bteng ia ka jingiakhih katba ka sorkar kam pat shim ia ka rai halor kane ka jingdawa.”

Haba kylli halor ki dkhot ka Committee, u samla Toniho u la ong, “Ka long kaba sngew bynniaw ba ka sorkar kam shym la thung ia kino kino kiba tip bha shaphang ka NEHU bad halor ki jingeh kiba ka skulbah ka iakynduh. Ka jingdon lang ki dkhot na ka Jylla kan jin da la wanrah ka jingshai halor ka jingdonkam jong ka skulbah bad ka thain.”

Nalor kata une u nongialam ki samla pule u la ong ruh, “Tad haduh ba ka sorkar kan pyntreikam ia ki jingdawa jong ngi ban weng noh ia u Vice Chancellor, ngin bteng ia ka jingshah thngan kaba khlem pud, kata kam pher halor ka jingthaw ia kano kano ka Committee.Ka jingdawa kaba hakhmat eh ka jong ngi ka sah kumjuh, kata ka long ban weng noh mardor ia u Vice Chancellor”.

Hadien kane ka jingshah thngan kaba la iaid 10 sngi mynta, u President ka NEHUSU u samla Sandy Sohtun u la shah kit noh sha hospital bad shah sumar hapoh Critical Care Unit (CCU) ha Civil Hospital, Shillong.

Hashwa kane, ki samla kiba la shah pynkit noh sha ka jaka sumar ka NEHU ki kynthup ia ka ka samla Ibakordor Marweiñ (Asst. GS KSU NEHU Unit), Aibok Nongsteng (Organizing Secretary KSU NEHU Unit), Fricky Marweiñ (Asst. Organizing Secretary KSU NEHU Unit), Robin Nongrem (Asst. Education Secretary KSU NEHU Unit) bad Ruksarbiya Khonglam (Asst. Hostel Secretary KSU NEHU Unit).