Rai ki samla pule NEHU ban shah ban pynlong klas noh naduh ka 3 tarik Nohprah

Syllad | The Rising MeghalayaDecember 3, 2024

Ki samla pule kiba don hapdeng ka jingiakhih hapoh ka lama jong ka North Eastern Hill University Students’ Union (NEHUSU) bad ka Khasi Students’ Union (KSU – NEHU Unit) ha ka 2 tarik Nohprah ki la pynbna ban shah ban pynlong klas noh naduh ka 3 tarik Nohprah.

Hynrei, ha kajuh ka por ki la rai ruh ban bteng ia ka jingiakhih da kaba shong kyllain mungor ba khlem pud kaba ar kynta tad haduh ba ka jingdawa ka jong ki ban weng noh ia u PS Shukla kum u Vice Chancellor ka NEHU kan urlong.

Haba kren sha ki lad pathai khubor, u General Secretary ka NEHUSU u Toniho Kharsati u la ong, “Ka jingdawa ba kongsan ka jong ngi ka long ban weng kam noh mardor ia u VC ba mynta. Ka la jan kynjoh sha ka shi bnai ba ngi khlem ioh pynlong klas hapoh ka skulbah, bad da kaba pyrkhat ruh halor ka lawei jong ki samla pule, ngim kwah ban pynpulom ia ka lawei jong ki samla tang namar ka jingbym lah treikam ba jong u VC. Kumta ka NEHUSU bad ka KSU ki la rai ban ailad ban pynlong klas biang noh naduh ka 3 tarik Nohprah.”

U la ong ba ki seng samla pule ki kyrpad ruh ia u VC Incharge u Prof N Saha ba un khot ia ka jingialang kaba kyrkieh ban iakren halor ka academic calender jong ka skulbah khnang ban pynthikna na ka bynta ka jingiaid beit iaid ryntih ha ki jingtreikam jong ka skulbah.

Haba pynpaw ba ka jinglong jai jai kan wanphai pat lada u Prof Shukla um wanphai shuh sha kane ka skulbah, hynrei u samla Kharsati u la ong, “Lada ngi shem ia kaino kino ki jingthoh ne ki jingaiktien kaba wan na une u VC ba u pyrshang ban wan rung biang sha kane ka skulbah, ki seng jong ki samla pule kin mih ban shim biang da ki sienjam kiba tyngeh ban khanglad ia ka jingwan rung ka jong u ha kane ka skulbah ka jong ngi.”

Nalor kata u pyntip ruh ba ki artylli ki seng jong ki samla pule ki la shim ia ka rai ban pynjur ia ka jingiakhih da kaba shong kyllain mungor tad haduh ban da weng noh shisyndon ia une u VC na kane ka skulbah.

“Ngi kwah ban phah ia ka khubor sha ki paidbah ba kane ka jingiakhih ka dang im bad ngi dang pynim ia ka da kaba pynlong ia ka jingiakhih shong kyllain mungor naduh ka por 3 baje janmiet haduh 5 baje janmiet man ka sngi.Ngi kwah ban pyni ba tad haduh ban da weng ia une u VC ngi ruh ngin ym pynsangeh ia ka jingiakhih.Hynrei ngin ialeh katba lah ban pynlong ia kane ka jingiakhih kaba jai jai,” u la ong.

Kham hashwa une u nongialam ki samla pule u pyntip ba ki la bishar bniah ia ki jinglong jingman hadien ka jingshim rai jong u Prof Shukla ban wan bteng biang ia ka kam mynta ka sngi.

“Ngi ieng skhem ha ka nongrim ba ngin ym ailad ia une u VC ba un dang wan iuhkjat biang ha kane ka skulbah. Hynrei ngi la ioh jingtip ba u la pynjlan biang ia ka shuti jong u haduh ka 13 tarik Nohprah. Ngi sngew skhem ba u VC u sngewthuh bha ba ka long kaba shem shitom ia u ba un wanphai biang sha kane ka skulbah da kaba khmih ba baroh ki kynhun ka NEHU, ki Sengbhalang bad ki shnong ki thaw bad ka Jylla baroh kawei ki la ngiah ia ka jinglong nongialam ka jong u bad ba kim kwah shuh ba un dang wan iuhkjat hapoh kane ka skulbah.