Rai ki seng pyniaid kam jngohkai ban pynneh ia ka suk ka sain bad ka jingshngain ki nongwan shangkai sha ka Jylla

Syllad | The Rising MeghalayaSeptember 30, 2024

Ki Seng kiba pyniaid ia ki kam jngohkai kynthup ia ki Tour Operator ha Meghalaya ki la rai ban pynneh pynsah ia ka  shongsuk shongshngain ha ka Jylla na ka bynta ki jingmyntoi jong baroh ki kynhun kiba pyniaid ia ki kam jngohkai pyrthei bad ki nongwan shangkai kumjuh.

Ia kane ka rai la shim ha ka jingialang ba la khot pynlong da ka Tour Operators Association of Meghalaya (TOAM) ha kaba la wan ban iashim bynta da ki 11 tylli ki seng pyniaid kam jngohkai bad ki Tourist Taxi Association hapoh State Convention Centre, Shillong ha ka 28 tarik Nailur.

Ha kane ka jingialang ka jingiakren ka la phaikhmat khamtam halor ki mat kiba ki nongniah kali Tourst bad khamtam ka jingpynsngew jong ka All Khasi Meghalaya Tourist Taxi Association (AKMTTA).

“Hadien ka jingiamir jingmut, ki dkhot jong baroh ki kynhun seng ki la ia mynjur halor ka jingkongsan ban pynneh ia ka shongsuk shongshngain ha Meghalaya na ka bynta ka jingmyntoi jong baroh ki kynhun kiba don bynta ha ki kam jngohkai bad ki nongwan shangkai pyrthei. Nalor kata ki la kular ruh ban pynthikna na ka bynta ka jingshngain jong ki nongwan shangkai sha kane ka jylla,” ong u kyrwoh.

Kine ki 11 tylli ki seng pyniaid kam jngohkai ka ka Jylla ki kynthup ia ka Meghalaya Tourism Development Forum (MTDF), All Khasi Meghalaya Tourist Taxi Association (AKMTTA), Tour Guides Association of Meghalaya (TGAM), All Shillong Tourist Taxi Drivers Union Organization (ASTTDUO), Meghalaya Tourist Taxi Association (MTTA), Federation of Shillong Hotels (FOSH), Sohra Region Tourism Association (SRTA), Jaintia Tourism & Environment Society (JTES), Khasi Hills Tourist Taxi association (KHTTA), bad ka Ri Bhoi Tourism & Environment Development Forum (RBTEDF).