Rai kiew ïinglieh ïingsaw ka CCIB halor kam ker sainar shiah na Jaliakhola haduh Dawki

Syllad | The Rising MeghalayaOctober 21, 2021

Ka Co-Ordination Committee on International Borders (CCIB) haka sngi Balang kala rai ban ujor sha ka ïing bishar Meghalaya High Court halor ka jingiaid shakhmat ka sorkar ban ker sainiar shiah na Jaliakhola shaduh Dawki kaba la ktah iaki phew phew acre ki jaka jong ki nongshong shnong ha khappud India Bangladesh.

Ia kane ka rai kala shim haka jingialang kaba long ha Enowell Hall, Amlarem kaba la wan ban iashimbynta da ki trai jaka na kylleng ka war Jaintia kiba sah ha khappud, ka JSU, KSU, Dawki Tourism Development Society (DTDS) nalor ki nongialam ka CCIB ba kynthup ia u Sukkynjai Myrchiang chairman, Kmen Myrchiang Secretary CCIB, Morningstar Suja bad kiwei kiwei.

Ka CCIB kala khot iaka jingialang hadien ba Jaintia Hills Autonomous District Council (JHADC) kala pynkhie im biang NOC kaba la ai naduh u snem Nailur 2015 kaba la pyndam ha u snem 2017 na ka bynta ban ailad iaka sorkar ban iaid shakhmat ban ker sainar shiah ne ka IBBF (Indo-Bangladesh Border Fencing) na Jaliakhola (BP- No. 1299) haduh Dawki (BP NO. 1273) kaba iasam pud ka Jylla bad ka Bangladesh.

U Ma Kmen Myrchiang ula pynpaw iaka jinglyngngoh halor ka jingle jong ka JHADC kaba la leh bymsuidniew ia u paidbah ba shah ktah ka jaka ban ker sainar haduh 150 yard lane 137 meter.

“Ki trai jaka bad ka CCIB ngim ïoh jingtip eiei halor kane ka jingleh jong ka District konsil hynrei lyngba ka RTI kaba ngi la ïoh pdiang haka 13.09.2021 ngi lap ba ka District konsil ka pynim biang ïaka NOC kaba ka la ai ha u snem 2015 bad kaba la pyndam (Cancel) ha u snem 2017 bad une u snem 2021 ka District konsil ka la pynim biang ïa kane ka NOC khlem ka jingpynsngew paidbah bad khlem ka jingtip jong ki MDC ka thaiñ bad la leh ïa kane tang da ka Executive Committee jong ka JHADC”, la ïathuh u Bah Myrshiang.

“Ngi pynrem jur ïaka jingthombor bad leh donbor ka District konsil ïaki jaka puta jong ngi. Ïa ngi ki riewlum la pynhap hapoh ka 6th Schedule ngi don ka hok halor ki jaka jong ngi te kumno kane ka District konsil kaba dei ka nongbat ïaka khyndew ka shyiap kam pyntip ne kynjoh ktien eiei ïaki trai jaka kumjuh ki waheh shnong bad ki dolloi hashwa ba kan leh ïa kane kam.

Ka CCIB ka lap ba ka District konsil ka ai NOC halor ka Section 41 jong ka Clause (3) jong ka Land Acquisition Act hynrei haba peit bha ïa kane ka aiñ ka treikam tang haka 5th Schedule ym haki 6th Schedule.

Ula ong ba ka CCIB kam pyrshah ïaka jingker sainar shiah hynrei ngi kwah ba ka sorkar kan pynbeit shwa ïa u pud u sam hapdeng ka India bad Bangladesh katkum ki dulir ne ki kot ki sla ba ki trai jaka trai khyndew ki don khnang ba ka jingker sainar shiah kan ym ktah ne pynduh nong ïaki trai jaka kiba im lyngba ka rep ka riang.

Ynda la dep pynbeit ïa u pud u sam ka Fencing kadei ban ïaid ha u Zeroline namar naduh ba ngi ïoh ïaka jinglaitluid haduh mynta ngim don ïa u pud u sam uba thikna bad uba ngi don mynta udei tang u temporary boundary.

Ula ong shuh shuh ba ka CCIB kala rai ban ujor noh sha ka Meghalaya High Court halor ka jingai No Objection Certificate (NOC) sop sop district konsil ban ker sainar shiah bad la pynrem jur ïaka District konsil kaba ai NOC khlem ka jingbit jong ki trai jaka trai khyndew ne khlem ka jingpynsngew paidbah (Public Hearing).

U dkhot jong ka Dawki Tourism Development Society (DTDS) ula pynsngew ba naduh ba wan Tourism ha Dawki ki samla ki ïoh shibun ki jingmyntoi bad katkum ka jingthmu jong ka sorkar la mang ban ker sainar shiah shiteng ka shnong Dawki bad kane kan ktah ïaka kamai kajih jong ki namar bun kiba kamai jakpoh lyngba ka kam tourism.