Rai kyrshan Madonbai Rymbai ia u Andrew Shullai kandidate ka AITC na Jowai Constituency, ap ruh iaka rai BJP
U Ma Madonbai Rymbai u Chief Executive Member (CEM) barim jong ka Jaintia Hills Autonomous District Council (JHDAC) ula pynbna paidbah ban ai ka jingkyrshan kaba pura ia u kyrtong ka All India Trinamool Congress (AITC) u ma Andrew Shullai na Jowai Constituency.
Kaba phylla pat kalong ba u Ma Madonbai Rymbai haba kren bad ki nongthoh khubor haka sngi ba ar, ula ong ba ka jingiakren bad ki nongialam ka Bharatiya Janata Party (BJP) ka dang iaid shakhmat halor ka kam iakhun elekshon jong u.
“Ngan ap sa katto katne sngi iaki nongialam BJP bad lada beit ka jingiakren ngan iakhun iaka elekshon MLA dalade kum u official kandidiate ka BJP,” la ong u Ma Madonbai Rymbai.
“Lada ka BJP kam lah ban rai wat hadien ka jingiakren kaba la iaid la katto katne bnai nga la rai ban ai ka jingkyrshan kaba pura ia u Andrew Shullai kandidate ke AITC na Jowai Constituency,” la ong u ma Madon bad bynrap ba un kyrshan kum u riew paidbah namar ba u khlem pynsiasoh ialade bad kano kano ka party naduh ba ula iehnoh iaka NPP naduh u Naiwieng 2019 kum dkhot ka party.
Shuh shuh u ma Andrew ula ong ba na kaliang u Ma Madon, u Dr RC Laloo MLA barim ka Jowai uba la long kum u nongai buit bad nonghikai jong u kila rai ban kyrshan ia u ha kane ka elekshon MLA 2023 ban wan na Jowai Constituency.
“Kane ka kam ban pyniasoh sha ka AITC ka dei kaba la leh da ka jingsngewthuh jingmut ryngkat bad u ma RC Laloo, ki nongkyrshan jong nga, kumta nga la rai ban iakhun na ka AITC ban wanrah iaka roi ka par kaba salonsar,” la ong u m Andrew Shullai bad bynrap ba haka 10 tarik Naiwieng kan don ka jingpdiang burom ka AITC iaki nongialam dkhot ka Jowai Block ha madan Jrisalein, Chutwakhu, Jowai.
Leave a Reply