Rai pynrem ka ïingbishar ar ngut kiba thombor iaki kynthei khynnah

Syllad | The Rising MeghalayaJune 30, 2022

Ka ïingbishar ba don burom jong ka West Jaintia Hills District kala rai pynrem iaki ar ngut ki briew kiba donkti ban thombor iaki kynthei khynnah ha ki ar tylli ki case hapoh ka district.

Kine ki ar ngut kiba shah rai pynrem ki dei u Murtibiang Surong bad Francis Suchiang.

U Superintendent of Police, West Jaintia Hills District u Bikram D Marak haka sngi Balang ula iathuh ba haka 28 tarik une u bnai ka Court of Special Judge (POCSO Act), West Jaintia Hills,Jowai, kala rai pynrem ia Francis Suchiang katkum ka kyndon aiñ hapoh ka Sec 8 POCSO Act bad rai pynsaja da kaba set phatok Saw snem ryngkat ka kuna T.6000/- bad lada ym lah ban siew iaka kuna un bteng ban shong phatok sa 2 bnai bad kawei pat ka jingpynshitom katkum ka section 506 IPC bad ka kuna T.2000/- bad lada ym lah siew iaka kuna un shah set phatok sa 1 bnai.

Kawei pat ka jingrai pynrem ka dei pyrshah ia u Murtibiang Surong, ka ïingbishar District Session Judge, West Jaintia Hills, Jowai haba bishar iaka mukotduma haka 30 tarik Jylliew kala lap ba u Murtibiang Surong u donkti ban thombor ia kawei ka kynthei katkum ka kyndon aiñ hapoh ka section 376 IPC. Ka ïingbishar kala rai pynrem ia u Murtibiang Surong da kaba rai set phatok 12 snem lynter bad ka kuna T. 50,000/-.

U SP ula ong ba u Murtibiang u donkti ban lehbeijot iaka kynthei ha ka jingjia kaba la jia naduh u snem 2016. La registered iaka case ha Amlarem PS case No.18 (11) 2016 U/S 376 IPC bad ka WPSI O Tyngkan kala tohkit ia kane ka jingjia bad buh jingthoh.

Katba u Francis u don ka case ba u thombor iaka khynnah ha u snem 2018 katkum ka case kaba la registered ha Jowai PS case No.39 (02) 2018 U/S 506 IPC R/w Sec 7/8 POCSO Act, ka WPSI R M.Suchiang  kala tohkit ia kane ka jingjia bad buh jingthoh.