Rai pynrem ka Special Judge POCSO ia uba lehbeijot ia u khynnah rit ha East Jaintia Hills

Syllad | The Rising MeghalayaMarch 2, 2022

Ka Special Judge (POCSO) Khliehriat, East Jaintia Hills District kala rai pynrem ia uwei u briew uba kyrteng u Shaniah Langstang uba donkti ban lehbeijot ia u wei u hep rit ha East Jaintia Hills District.

Kane ka jingjia shah lehbeijot une u hep rit ba dang 6 snem ka rta ha u Shaniah Langstang kala jia haka 14 Rymphang (February) 2020 ha kawei ka shnong kaba hap hapoh East Jaintia Hills District.

Ka Special Judge (POCSO) Khliehriat, East Jaintia Hills District haba shong bishar ia kane ka mukotduma haka 28 tarik Rymphang jong une u snem kala pynmih iaka hukum ban rai pynrem ia une u Shaniah Langstang da kaba set phatok 20 snem ha ryngkat ka kuna kaba T.3 lakh katkum ka ka kyndon aiñ section 377 IPC bad ka Section 6 POCSO Act 2012.