Rai set byndi ka iingkashari ia 3 ngut kynthup u doktor ba lehbein iaki khynnah rit

Syllad | The Rising MeghalayaApril 3, 2025

Ka iingkashari u Special Judge POCSO, West Khasi Hills, Nongstoin, u M Kumar, ka la rai pynrem ia uwei u doktor uba jrongkti bad leh khlem akor ia kawei ka khynnah rit ha ka thain Mairang da kaba set phatok haduh 20 snem kynthih.

Une u doktor uba la shah rai pynrem u dei uba la tip kyrteng kum u Ayam Sunil Khuman 58 snem rta uba shong ba sah ha Pyndengumiong bad ba dei u trai shnong napoh Khurai, Imphal East District.

Nalor ka rai set phatok kaba 20 snem kynthih, ka Kashari ka la dain kuna ruh T.1,25,000 hapoh ka kyndon 6 jong ka POCSO Act bad 5 snem ha phatok ryngkat ka kuna kaba T.25,000 hapoh ka kyndon 10 jong ka POCSO Act, bad lada um lah ban siew ia kane kuna un hap ban shong phatok sa na ka bynta 6 bnai.

U Superintendent of Police ka Eastern West Khasi Hills, Mairang u pyntip ba une u doktor u dei uba don ia ka Clinic ha ka shnong Pyndengumiong, Mairang, bad ia kane ka kam bymman jong une u doktor la mudui da ka ejahar sha ki bor pulit ha ka 27 tarik Naitung 2020.

Halor kane ka jingujor ki pulit ki la register case pyrshah ia une u Doktor ha Mairang Police Station ha ki kyndon 7/8 POCSO Act bad la tohkit ia ka da ka WPSI RR Marak jong ka Mairang Police Station hadien ba la kem noh ia u bad phah sha Judicial custody.

Beh ia u doktor kynshlein kynthei, ong ka KSU iaka tnad ka koit ka khiah

Ka Iingkashari ka la rai pynrem ruh ia u Buksar Lyngdoh Lyngkhoi 37 snem rta uba dei na ka shnong Dombahkseh, EWKH da kaba set phatok 20 snem rta ha ryngkat ka kuna kaba long T.15,000/- ha kaba un hap ban shong tam ha phatok sa na ka bynta hynriew bnai lada um lah ban siew namar ka jingjrong kti bad leh khlem akor ia kawei ka khynnah rit ha ka jingjia kaba la jia ha ka 4 tarik Kyllalyngkot 2023.

Ha kajuh ka por ka Iingkashari ka la rai pynrem ruh ia u Phrangsngi Ryntathiang 27 snem rta uba dei na ka shnong Dongkiingding da kaba set phatok 3 snem kynthih ha ryngkat ka kuna kaba T.10,000 bad ban shah set tam hynriew bnai lada um lah ban siew ia ka kuna namar ka jingjrong kti bad leh khlem akor ia kawei ka khynnah rit ha ka 4 tarik u Naitung 2023.