Rai set byndi shi jingim ia u lok ba pyniap iaka nonghikai skul ha Jowai
Ka iingkashari District Court bad Session Judge NA Khan ha kaba khatduh ka la rai pynrem ia u runar uba donkti ha kaban pyniap dusmon ia la ka jong ka kurim kaba dei ka nonghikai skul kaba dang don ha ki rta 20 snem kaba la jia naduh hynriew snem saw bnai mynshuwa.
Ka iingkashari ka la dain kuna ruh ia une u runar uba kyrteng u Shwamiki Law uba donkti ha kaba pyniap ia la ka jong ka kurim ka Kong Daphibanker Phawa T.5000 bad aijingmut ruh ba u dei ban siew ia ka bai lutksan kaba T.6 lak na ka bynta ki laingut ki khun jong kane ka lanot kiba dei ruh ki khun ki jong u hi.
Une u runar u la siah ruh ia lade da ka tari na u ryndang ban pyni ba ka kurim jong u ka la shah pyniap ha ki briew ki bym lah ban ithuh kiba la thombor ruh ia u katba u dang pyrshang ban iada ia la ka jong ka kurim ha ka jingjia kaba la jia ha ka 11 tarik Risaw 2018 hapoh ka iing kaba ki shongwai kaba dei ruh ka iing ka kmie jong une u runar ha Riatsiatsim, Iawnusniang, Jowai.
Ka Kong Daphibanker ka dang don hapdeng ka jingioh thiah hadien ba u kurim jong ka u la thombor ia ka da kaba siah da ka tari na u ryndang. Hadien u la siah ruh ia la u jong u ryndang ban shu mynsaw malu mala bad mareh sha ka iingkmie jong u bad pyntip ha ki ba don ki runar kiba wan rung ha ka iing jong u bad pyniap ia ka kurim jong u bad pynmynsaw ruh ia u kumjuh. Ia u Shwamiki la pynkit noh shapoh Dr Norman Tunnel Hospital Jowai na ka bynta ban aijingsumar.
Hadien kane u kpa jong u Shwamiki u la mudui da ka ejahar pyrshah ia ki runar ki bym lah ban ithuh bad ia la case la register hapoh Jowai PS ha ki kyndon 307/302 IPC bad ia ka jingtohkit halor kane ka jingjia la aiti ha ka Sub Inspector (WPSI) Kong I Kharpran.
Ka jingthmu ba rieh jong une u runar ka la pulom hadien ba la pynlong ia ka jingtohkit kaba bniah da ki bor pulit kiba la lapdien ia ka kam shukor ka jong u ha kaba ia kane ka case la chargesheet bad tian bishar haduh ba un da shah rai pynrem da kaba shah set phatok shi jingim.
Facebook
Instagram
Youtube
Twitter
Ki nongpyniap bru hi tea,biang hi wa kset byndi shirata,khnang ioh thngat ki bru deini chakhmat,ioh lait wa jia bunsien.