Rai set phatok ka ïingbishar 10 snem ia u Arnab

Syllad | The Rising MeghalayaMarch 10, 2022

Ka ïingbishar Special Judge, POCSO, Khliehriat East Jaintia Hills District kala rai ban pynshitom da kaba set phatok haduh 10 snem lynter ia u Arnab Lamin halor ka jingdonkti ban lehbeijot.

Une u Arnab u dei uba na ka shnong Nongbareh, West Jaintia Hills, u donkti ha kaban lehbeijot ia kawei ka khynnah kaba dang 8 snem rta haka 16 tarik u bnai Jylliew 2015 ha kawei ka shnong ha East Jaintia Hills District.

Ka ïingbishar katkum ka hukum kaba kala pynmih haka 7 tarik une u bnai pyrshah ia u Arnab kala rai ban pynsaja da kaba set phatok 10 snem ryngkat bad ka kuna kaba T.3 lak katkum ka kyndon aiñ hapoh ka Section 377/506 IPC bad ka Section 6 POCSO Act.