Rai set phatok shi jingim u Aloi Suiam halor ka kam pyniap

Syllad | The Rising MeghalayaApril 4, 2024

Hadien ka jingap khmih lynti kaba la iaid mynta la jan dap 19 snem kynthih, kiba haiing hasem jong u Rishanki Biam u lanot ba la shah pyniap ha kaba khatduh ki la ioh ia ka jingbishar hok hadien ba ka Kashari u Session Judge ha West Jaintia Hills District, Jowai, ha ka 28 tarik u Lber ba la dep ka la pynbna ia ka rai pynrem pyrshah ia u Aloi Suiam da kaba set phatok shi jingim.

U Superintendent of Police ka WJHD lyngba une u kyrwoh u la ong, “Ha kaba khatduh la pynioh ia ka jingbishar hok hadien ba ka Kashari u Session Judge, WJH, Jowai lyngba ki sakhi satar kiba biang la shem ba u Aloi Suiam u dei uba donkti ha ka kam pyniap ha kaba la rai pynrem ia u hapoh ki kyndon Section 302 IPC, kata ban set phatok shi jingim.”

Ha kajuh ka por ka Kashari ka la hukum ruh ia une u runar ba la shah rai pynrem ba un hap ban siew ia ka kuna kaba long T.3 lak sha kiba haiing hasem jong utei u lanot ba la shah pyniap.

Katkum ki pulit la ong ba ha ka 06.09.2005, ki la ioh pdiang ia ka jingujor ejahar na u Bah Linus Sumer uba dei u kpa jong u lanot ba la shah pyniap u Rishanki Biam, da kaba kynnoh ba u Aloi Suiam u la pyniap dusmon ia u khun jong u ha ka jingjia kaba la jia ha ka 29.09.2005 hapoh ka shnong Saphai.

Hadien kane la rejistar ia ka case hapoh Jowai PS Case No. 121 (9) 2005, hapoh ki kyndon Section 302 IPC, ha kaba ia ka jingtohkit la shimti da u SI u B Singh.