Rai ka sorkar Jylla ban pynjlan iaka elekhon MDC jong ki ar tylli ki konsil

Syllad | The Rising MeghalayaFebruary 2, 2024

Ka jingialang jong ka kynhun Myntri ka Sorkar Jylla haka 2 tarik Rymphang kala rai ban pynjlan iaka elekshon MDC jong ki ar tylli ki konsil, kata ka Jaintia Hills Autonomous District Council (JHADC) bad Khasi Hills Autonomous District Council (KHADC).

Ia kane la pyntip da u Symbud Myntri Rangbah ka Jylla bah Prestone Tynsong haba kren bad ki nongthoh khubor hadien ka jingialang ka kynhun Myntri jong ka sorkar MDA.

U Symbud Myntri, ula ong ba kane rai la shim hadien ba ki executive committee jong baroh ar tylli ki konsil dang shen, kila pan por ban pyndep iaka jingphiah constituency. Ula ong ba ka samoi (term) jong ki executive committee jong kine ki konsil kan kut 5 tarik u bnai Lber 2024, hynrei kine ki konsil kila pan por sa 6 bnai ban bteng iaka samoi treikam jong ki.

“Ngi la ioh iaka jingkyrpad na baroh ar tylli ki council ba kila kyrpad ban pynjlan iaka samoi jong ki executive committee, namar ba ki committee na ka bynta ka delimitation ne ka jingphiah constituency kila pan por ban pyndep iaka jingphiah constituency bad ka kam ka dang iaid shait shait bad ki dang pynlong iaka jingpynsngew paidbah bad kaei ka kaiphod kaba mih yn sa shim pat iaka rai ha ki khyndiat bnai,” la ong u Bah Prestone.

Kumta ka DCA kala bishar bin pa bin iaka jingkyrpad jong kine ki konsil bad ha kaba kut ka kynhun myntri ka sorkar mynta ka janmiet kala mynjur ban ai por sa 6 bnai iaka samoi jong ki konsil kaba mynta. Kane ka por kaba la pynjlan kan long naduh 5 tarik Lber bad ia kane ka rai ka sorkar kan phah sha u Lat ban ioh iaka jingmynjur, la ong u Symbud Myntri Rangbah ka Jylla.