Rai u Bah Sanbor ban thaw da ka Committee ban iakhun pyrshah drok hapoh South Shillong

Syllad | The Rising MeghalayaOctober 3, 2024

Ka jingialang ba la khot pynlong da u MLA ka BJP na South Shillong u Bah Sanbor Shullai ha ka 2 tarik Risaw ka la rai ban thaw da ka Committee ka ban kynthup ia ki Dorbar Shnong bad ki nongshong shnong ban iakhun pyrshah ia ka jingshyrkhei jong u drok bad ban tehlakam ia ka jingwan rung jong ki poiwir hapoh constituency.

“Ngi la shim ia ka rai ban thaw ia ka Committee bad ngin sa jied ia ki dkhot na ki Dorbar Shnong, Village Council bad ki kynhun bapher bapher bad ngin sa phah bad aijingmut ia ki kyrteng sha ka sorkar,” ong u Bah Sanbor haba kren sha ki lad pathai khubor hadien ka jingialang hapoh Jhalupara community hall ba la iadon lang da ki heh pulit bad ki kynhun na Shillong Cantonment Area.

U la ong ruh, “Dang shen ka sorkar Jylla ka la thaw ia ka Committee ban khmih halor kane ka jingjyllei jong u drok, bad ngan sa phah ia ki kyrteng napoh Shillong Contonment Area ban ioh rung dkhot ha kane ka Committee ba la thaw da ka sorkar.”

Ka jingpynlong ia kane ka jingialang ka long ruh kaba kongsan bha khamtam hadien ka jingshah kem noh jong ka Aisa Khatoon ia kaba la tip ruh kum ka ‘Phari,’ kaba dei ka nongkhaii drok ba shyrkhei na Paltan Bazaar.

“Ka mat kaba iadei bad u drok ha ki jaka kiba hap hapoh ka Shillong Cantonment kadei kaba sngewkhia shibun namar bunsien ka kyrteng jong ka Cantonment ka la bteng ban mih paw lyngba ki lad pathai khubor. Ka jingshah kem jong kane ka snar nongkhaii drok (Aisa Khatoon) ka la pynkhihwin shibun ia ka nongbah Shillong.Na ka liang ki pulit ki don ruh ka jingthmu ban pynngat ia ka ha ki kyndon ba tyngeh jong ka NDPS Act,” u la ong.

Nalor ka jingiakhun pyrshah ia u droks, kane ka jingialang kala iakren ruh halor ki jingsngewkhia na ka jingwan rung ki briew ki bym ithuh ithaw ha ka thain bad ban jur ba baroh ki briew ki bym dei ki nongshong shnong ka thain ki dei ban don ia ki kot ki sla kiba biang kynthup ia ki jngpynshisha na ki Pulit napoh ki jylla kiba ki wan khnang ban pynthikna ba kim dei kiba don dak sniew lane ki poiwir napoh Bangladesh.

U Bah Sanbor u la maham ruh ia ki nongshim wai ha Paltan Bazaar ha ki thain Paltan Bazaar ba ki dei ban shim ia ka jingkitkhlieh bad maham ruh ba lada lap ia ki trai iing kiba ai jaka rieh ia ki riew bymman kin ngat ha ka jingshah pynshitom katkum ka ain.