Ap ka ma kylla mraw u paidkar, rai u Damewanhi Rymbai ban iakhun elekshon na Khliehriat

Syllad | The Rising MeghalayaJuly 4, 2022

U Damewanhi L Rymbai, u nongialam barim ka Jaintia Youth Federation (JYF) bad uba don bynta ha kiba bun ki kynhun trei mon sngewbha ban wanrah iaka roi ka par ka thain East Jaintia Hills District, ula pynbna paidbah ban aireng haka elekshon MLA 2023 na 6 Khliehriat Constituency.

U Ma Damewanhi haba kren bad ki nongthoh khubor haka sngi Nyngkong ula ong ba ka daw ba u rai ban iakhun iaka elekson ka dei ha ka nongrim ban wanrah iaka roi ka par kaba salonsar ia u paidbah ka thain.

“Ka daw kaba la shim ia kane sienjam ban aireng iaka elekshon MLA na Khliehriat ka dei bala hiar ka ioh ka kot ki nongshong shnong, kaba la ktah iaki ha baroh ki liang,” la ong u Ma Damewanhi.

Ula ong shuh shuh nalor ka jinghiar ka ioh kot naduh bala khang ia u dewiong naduh u snem 2014 haduh mynta kam din shuh shuh kano kano ka lad ban bujli ia ka lad ka mai kajih.

“Baroh ki skim sorkar bording kaba kynthup iaka Saubhagya Scheme ka ban pynpoi bording ha manla ki shnong, ka umbam umdih ne ka skim Jal Jeevan Mission, ka koit ka khiah ka pule ka pule bad kiwei kiwei baroh kine ki phiel ka jingtreikam hapoh ka district,” la ong u Ma Damewanhi.

Ula bynrap shuh shuh ba ki surok, ki pule puthi naduh primary haduh higher secondary katba nangmih ki snem nang sahdien. Ula ong ba jingdawa kaba kyrkieh mynta ka long ban ioh iaka Government College bad lada u shah jied u iakhun tyngeh ban pynioh iaka kolej sorkar.

“Ka lad iohkam iohjam la haka kam sorkar ne haka jong ki riewshimet ym don ba peit khmat ban pynioh kam iaki samla,” la ong u Dame bad kren bynniaw halor ka jingngop ki samla ha u droks kaba naka sorkar kam shimkhia eiei ban iarap ban buh iaka Rehabilitation Centre ban sumar sukher iaki ba kyrni haka jingdih buaid.

Shuh shuh ula ong ba naduh bala phiah iaka Jaintia Hills bad thaw iaka East Jaintia Hills district ha u snem 2012, kaba sngewsih kalong ba ki tnad sorkar kim lah ban ai ka jingshakri kaba pura ia u paidbah bad kiba bun hi ki tnad ki shong iing wai bad I kumba kin duh kin dam noh.

“Nga angnud ban pynlong iaka Wapung C&RD bad ka Khliehriat ka sorbah jong ka district ba kin long ki nuksa ia kiwei ki district ha jylla haka roi ka par kaba salonsar la haka tourism, sports, ka rep ka riang bad ban pynlong iaka district kaba lait n aka bamsap bampong,” la ong u Dame bad bynrap ba u ruid nuksa bad thaw ki lad ki lynti ban wanrah iaki jaka ai jinghikai iaki samla ban seng kam bad ban ieng hala ki jong ki kjat.

Ula kynthoh ruh halor u dewiong ba kiba ioh kamai ki dei tang katto katne kiba la ia tip ka pyrthei baroh, kiba la tip kum ki high level, hynrei uba bun hi u paidkar u kylla mraw n aka kam khaii dewiong.

Ula kynthoh jur iaka jingleh sop sop ka sorkar MDA kaba thmu ban iuhroit aika hok long trai jaka da kaba pynheh iaka mining plan ne SOP ban ioh tih deiwong kaba haduh 100 hectare. Ka 100 hectare ym don uwei ruh u nongkhaii ne trai jaka ba don jaka haduh 100 hectare bad kane ka dei ka kawei na ki buit sianti ka sorkar MDA ban iuhroit ia u paidbah, la ther u Dame.

Ula buh jingkylli iaka sorkar MDA balei baka pynjlan ne shimpor ban lilam ia u dewiong bala dep tih uba don 32 lak ton bad haduh mynta na u 32 lakh ton la dep ban die tang 75 hajar ton.

Ha kaba iadei bad ka ticket ne ka party un shim iaka rai ha ki khyndiat sngi ban wan.