Rai u DC Jowai ban nym ailad ia ki paidbah ban tied marbam mardih lashai ka sngi

Syllad | The Rising MeghalayaMarch 26, 2020

Ka jingap khmih lynti jong ki paidbah jong ka West Jaintia Hills District ban ioh leit thied mar bam mar dih ha ka Sngi Thohdieng kumba rai ka sorkar jylla ka la pulom namar ba u Deputy Commissioner jong ka District u Bah Garod L N S Dykes u la pynbna ba ka korphiw kaba la pynjari naduh ka Sngi Ba Ar mynta ka taiew kan bteng beit haduh ka Sngi Saitjain mynta ka taiew.

U Bah Dykes u la kyntu ia ki paidbah ba kin shong khop ha la ki iing ki sem bad kin nym shabar iing ne leit sha ki iew ki hat bad ki jaka paidbah khnang ban iada na ka jingpang COVID-19.

Ha kawei pat ka liang, u Bah Dykes u la khot ia ka jingialang mynta ka janmiet ha ka kamra treikam jong u haba la iadon lang u Bah Alan Niangti, President, Synjuk ki Rangbah Shnong, u Bah L.D. Lakiang. General Secretary, Synjuk ki Rangbah Shnong, u Bah A.I. Gatphoh, Waheh Shnong, Caroline Colony, Jowai bad u  Bah Pyrkhat Shylla, Asstt. President, Mookyrdup, Jowal.

Hadien ka jingiakren kaba bniah kaba dei bad ka jingthawlad ban pynsuk ia ki nongshong shnong ha ka juh ka por ban bud ryntih ia ki jingpyniaid jong ka sorkar ban iada ki  na ka jingpang COVID-19.

Ki nongpyniaid jong ki Dorbar Shnong kin pyrkhing ia baroh ki nongshong shnong ki ba dang shu wanphai na ki jylla ne ri kiba la shah ktah ha u khniang jingpang COVID-19.

Ki trai jong ki LPG Agency ki dei ban da pyntip lypa ia ka sngi ka por ban sam gas sha ki bor pyniaid district bad shnong bad sam ruh da ka jingleit beit beit sha ki iing ki sem ne ka home delivery

 La shaniah ha ki nongpyniaid shnong ba kin pynbeit ia ka por kumno ban sam ration ha ki shnong ki thaw hynrei ryngkat bad ka jingbud ryntih ia ka social distancing.

Ki bor pyniaid District ki la pynbeit kumno ban sdang noh ia ka home delivery jong ki mar bam mar dih haba artylli ki kynhun ki la wan shakhmat ban iatreilang kata ka sylladstore.com bad ka Iaw Jowai.

Ka ladon ka jingpynsngew ba ki don nongshongshnong kiba shem shitom ban pynbiang ia ki jungdonkam ka bam ka dih namar ka Curfew bad ka la kyrpad ia ki bor District ban pyrkhat ban thawlad kumno ban iarap ia ki.

La mynjur ban thung ia ka District Citizen Support Committee ban iatreilang ha kane ka por ka jingiakhun pyrshah ia u COVID-19.