Rakhe ka Akashvani-Jowai ia ka lyngkhuh snem da ka musical concert
Ka Prasar Bharati, ka Public Service Broadcaster jong ka Ri India, Akashvani-Jowai, ha ka 21 tarik Nohprah ka la ioh ban rakhe ia ka lyngkhuh snem kaba 30 jong ka, naduh ba ka la sdang ia ka jingai jingshakri ba kyrpang ha kine ki 29 tylli ki snem kiba la leit noh hapoh Rilum Jaintia.
Ha kane ka prokram ba la pynlong hapoh Kiang Nangbah Government College Auditorium Hall, Jowai la ia don lang ruh u Deputy Commissioner, West Jaiñtia Hills District, u Bah BS Sohliya kum u Kongsan nalor u Additional Director General (A&BO) CO, Akashvani NEZ Akashvani & Doordarshan u Ashish Bhatnagar, ki heh na ki Tnad Sorkar, ki dkhot na ka Akashvani Jowai nalor kiwei kiwei.
Ha ka jingkren kum u kongsan u Bah Sohliya u la pynkynmaw ia ki sngi ba la phah ia kawei ka jingkyrpad jingrwai lyngba ka postcard bad nangta la pule kyrpang ia u nongpdiang. U la ban jur ia ka jingdonkam jong ka FM radio ha kaba ai ia ki jingtip kiba kordor, khamtam na ka bynta ka jingmyntoi jong ki nongrep. U Sohliya u la pynkut da kaba pynpaw ia ka jingdonkam jong ka pyrthei baroh kawei ia ka jingpynbyrngia ha ki rukom bapher bapher, kata la ka long lyngba ki jingrwai, ki video, ne kano kano ka rukom ka ban pynsngewthuh.
La pynshongkun ia kane ka prokram da ka jingpyni ia ka video lyngkot ia ka histori jong ka Akashvani Jowai, ha kaba u Deputy Director (E) Cluster Head, u Bah Hamarlin Diengdoh u la ai ia ka jingkren pdiang bad pynbud da ki jingrwai na ki staff jong ka Akashvani, Jowai.
La pynkut ia kane ka jingrakhe da ki jingshad jingrwai Khristmas ba la iashim bynta da ka Lyngkitbait Lyngdoh bad ka kynhun bad bud da ka jingshad tynrai Jaintia na ka Chanhun Laloo bad ka kynhun.Hadien la bteng da ki jingrwai tynrai nalor ki jingrwai Hindi bad kiwei pat ki jingpynbyrngia.
Facebook
Instagram
Youtube
Twitter
Leave a Reply