Rakhe Children’s Day ka WWO Seinraij Jowai

Syllad | The Rising MeghalayaNovember 15, 2024

Ka Women’s Welfare Organisation, Seiñraij Jowai haka 14 tarik Naiwieng kala lehkmen iaka sngi kyrpang ki khynnah ne ka Children’s Day 2024 ha iing hall ka Seiñraij ha kaba u President barim ka Seinraij Jowai u Ma OR Shallam ula long kum u kongsan.

Kane ka jinglehkmen ka long ban pynbyrngia iaki khynnah ka Playschool bad Crèche ka Seiñraij.

Iaka jingialang la pyniaid da ka Kong Waisa Sumer Chairperson WWO kaba la iathuh iaki kamram ka Women’s Welfare Organisation, Seiñraij kaba la sdang naduh u snem 1987-88.

U Ma OR Shallam ula ong iaka Children’s Day la kynmaw burom ha kylleng ki jylla ka ri India ban sngewnguh ia u Prime Minister ba nyngkong eh ka ri, u Pandit Jawaharlal Nehru.

Ula ong ba don ki khynnah kiba la ioh jinghikai na kane ka Creche, mynta kila long kum ki sahep, ki doctor bad u ngeit skhem ba kine ki khynnah kiba mynta ruh kin wanrah burom biang ia kane ka jaka da kaba kyrpad ruh iaki kmie ki kpa ban phai dieng biang sha kane ka jaka hadien habud.

Ula kyntu ruh iaki nonghikai ban ai ka jinghikai kaba long salonsar ia baroh ki khynnah.

U Ma Shallam ula pynkynmaw ruh ba mynshwa la ju lehkmen iaka Biar ka blai haka 14 tarik Naiwieng hynrei mynta pat namar bym don shuh kiba bat ia kane ka sngi la lehkmen iaka haka 12 bad 13 tarik don ruh kiba lehkmen iaka hadien ka 16 bad 17 tarik na kadaw ka eksamin ki khynnah.

La pynphuh ia kane ka sngi da ki jingshad na u na u Paila Ksiar bad ka Lasubon Ksiar 2024, u Salanda Oo Langdoh bad ka Manhaka Pakyntein bad na ki khynnah ka Play School bad ka Creché.

Ka Kong Duhaki Kyndiah nonghikai Play School kala ai ki kyntien nguh blei bad ka Ridaka Lamar Secretary ka WWO kala ai ki kyntien khublei.