Rakhe dap 50 snem ka HK Singh Memorial Lower Primary School

Syllad | The Rising MeghalayaJune 15, 2019

JOWAI: Ka HK Singh Memorial Lower Primary School kala rakhe ïaka jingdap 50 snem ka jingiaid lynti jong ka naduh bala seng ha u snem 1968. Ïa kane ka jingrakhe dap 50 snem kane ka skul la wan ban plie paidbah da u Ma Lahkmen Rymbui, Myntri ka Pule Puthi ka Jylla haka sngi Saitjaiñ.

Nalor u Myntri ka tnad pule puthi la ïadonlang u Rev. Derrick Pariat, President UUNEI uba long kum u symbud kongsan haryngkat ki khynnah skul bad ki nonghikai kiba barim bad kiba mynta.

U Ma Rupaia Lamarr Chairman SMC, ula ïathuh ïaka history lyngkot ka skul. Ula ïathuh ba ka Ka Balang Jowai ka dei ka Balang Unitarian kaba nyngkong ha kine ki thain kaba kynthup ia ka Assam bad ka Meghalaya bad la seng nyngkong haka 18 tarik u September 1887.

Dei hadien ba la seng ïaka Balang U Babu Hajom Kissor Singh ula iohi ïaka jingdonkam ban seng ïaka skul ban pyllait ïa ki nongshong shnong na ka jingsah dum namar ka jingbym nang ban pule bad thoh tar. Ha u snem 1893 ula sdang iaka Unitarian Free School, hynrei hadien ba ula mih na Jowai kane ka skul kala jah noh ha u snem 1904.

Hynrei ka balang kala shimkhia ban seng biang iaka skul ha u 1968 bad la pynsah nam haka kyreng u Babu HK Singh bad ki nonghikai ba nyngkong ki kynthup ïaka Kong Wanlang Laloo, ka Kong H. Shylla bad ka Kong E. Pakma.

U Ma Lahkmen haba kren kum u kongsan ula ai ka jingiaroh ïaki nongialam ka balang kiba ïohi jngai iaka jingkongsan ka pule ka puthi, kumjuh ia kiba mynta kiba la tynrong ka jingkitkhlieh ban pyntyllun ïaka shalyntem kane shlem ka ai jinghikai.

Ula ong ba sorkar na ka por sha ka por ka pynkylla iaka syllabus bad bud ruh iaka rukom pyniaid ka NCERT ban pynjanai iaka jingsam jingnang jingtad sha ki khynnah katkum ka juk mynta. “Ka sorkar kala dep phah pyntbit palat 3500 ngut ki nonghikai bad wat hapdeng ka jinghiran pisa ka sorkart kala ai jingiarap iaki spah tylli skul ban pynbiang iaka jingdonkam jong ki ban pynbha iaka pule puthi haka jylla,”la ong u Myntri Pule Puthi.

Ha kane ka jingplie iaka lyngkhuh snem kane ka skul, kaba yn rakhe baroh shi snem lynter la ioh ruh ka jingkren na u Ma T Passah Headmaster HK Singh Memorial Secondary School, u Ma Mehun Sutong khynnah skul barim, u Ma D. Pohchen bad la pynphuh pynphieng ia kane ka sngi da ki jingrwai bad ki jingshad na ki khynnah katei ka skul bad ka jingot ïa u cake da ki lai ngut ki nonghikai barim.