Rakhe dap snem ka Wyrcha VO Raliang kaba kdup 27 tylli ki SHGs

Syllad | The Rising MeghalayaJuly 20, 2019

JOWAI: Ka Wyrcha Village Organisation, Raliang ka seng jong ki Self Help Groups (SHGs) kaba kdup ïaki 27 tylli ki SHGs, kaba la sdang kiew rasong ha ki kam ki jam jong ka bad ioh jingmyntoi na ka jingseng iaki dukan ban die mar bam mar dih, ri jingri, rep sying, rep shynrai, riew hadem bad kiwei kiwei ki kam kala rakhe ïaka jingdap shisnem bala seng iaka ha ïing dorbar ka shnong Raliang haka sngi Thohdieng.

U Ma Coming One Ymbon, Myntri ka tnad Fisheries bad kiwei ula long kum u kongsan haka jingadonlang u Deputy Commissioner, West Jaiñtia Hills Garod LSN Dykes IAS, uba long kum u symbud kongsan, Chief Operating Officer MSRLS Bah SF Lyngdoh, BDO Laskein C&RD Block U Bah FB Basan, U Ma Robinus Syngkon MDC ka thain, Dolloi Elaka Raliang U Ma Chawas Lyngdoh, Waheh Shnong U Ma S Lamare u nongai buit ka ka Wyrcha VO bad kiwei kiwei. Ia ka jingïalang la pyniaid da ka Kong M Lyngdoh President ka Wyrcha Village Organisation.

Ka Secretary jong ka Wyrcha Village Organisation, Raliang, Kong S Lyngdoh kala ïathuh ba la seng ïaka Wyrcha Village Organisation, Raliang ha ka 19 tarik u Naitung 2018 da ki 19 tylli ki SHGs kiba don hapoh ka shnong Raliang lyngba ka program jong ka Sorkar Kmie ka National Rural Livelihood Mission (NRLM) ba la pyniaid da ka Meghalaya State Rural Livelihood Society (MSRLS) lyngba ka Block . Block Management Mission Unit (BMMU) Laskein.

Kala iathuh ba mynta hapoh kane ka VO (Village Organisation) ki don haduh 27 tylli SHGs bad kila ïoh shibun ki jingmyntoi lyngba kane ka Program NRLM. Haduh T. 32,75,000/- kila ïoh jingkyrshan pisa na ka NRLM kum ka Cumminity Investment Fund ban kyrshan baroh ki SHGs hapoh ka VO. Kane ka kynhun kala lah ban kynhsew pisa haduh T. 4,07,920/-.

Ka Revolving fund kaba la ïoh na ka sorkar lyngba ka NRLM ban kyrshan ïaki SHGs T.2,85,000/-.

Na ka Scheme NREGA lyngba ka jingiarap ka ophis Block Development Officer Laskein block T. 23,65,917/-, na ka Soil ki la ïoh T. 4 lak kum ka Revolving Fund bad hapoh ka Agriculture Development Officer ki la ioh ki symbai riewhadem bad lyngba ka ka Bank ki la ïoh ban shim ram T. 8,50000/-.

Ka Kong Lyngdoh kala iathuh ruh ba kane ka kynhun kala ïoh ruh ka lad ban leit shah hikai na ka bynta ban thung jhur tit da ka jingïarap jong ka IBDLP shapoh Umran lyngba ka Program RSETI. Ka Wyrcha VO ki la ïoh ruh ban leh shibun ki program hapoh ka Shnong kum ki jingtrei paidbah (Social work), rakhe International Women Day, Poshan Abhiyan bad kum juh ruh ban pynlong ïaki program shaphang kamno ban lait na ka jingdih kiad bad ka jingshong kha khynnah.

U Chief Operating Officer MSRLS, Bah SF Lyngdoh, ula ïathuh ba da ka jingdon ki SHGs kala plie lad plie lynti ïa ki spah ngut khamtam ki longkmie ban ieng hala ki jong ki kjat ban kamai jakpoh bad ban iakhun pyrshah ïaka jingduk jingkyrduh. Kum ka kynhun ki nongïalam bad dkhot baroh ki dei ban don ka jingïatreilang, ka jingïashaniah bad ka jingï sngewthuh jingmut ban pyntyllun ïaki kam jong ka kynhun baroh kawei ban wan ki jingmyntoi.

U la ong ruh ba ka Village Organisation ka dei kum ka Bank ka barit ka ban ïarap ia ki SHGs kiba don hapoh shnong. U la ong ba ba ki lad jingirap ba ai ka sorkar ruh ki SHG ki dei ban pyndonkam hok bad ki kloi ruh ban ki jait jinghikai bapehr bapher.

U BDO Laskein C&RD Block, U Bah FB Bsan ula kyntu jur ia ki longkmie kiba don job card ban don hapoh ki SHGs khnang ban kan nang pynkiew ia ka ioh ka kot jong ki namar lyngba ka Scheme NREGA shibun ki lad jingïarap ki lah ban ioh bad kum juh ruh kumno ban nang pynkiew shuh ia ka roi ka par hapoh shnong poh thaw. U la ong shuh shuh hapoh kine ki khyndiat bnai ki longkmie kiba don hapoh ka SHGs kila ïoh jingirap kumba T. 23, 65917/-. Ula khot la wer ïaki longkmie ba rung ne thaw ïaka kynhun SHG ban kyrshan dalade ïalade.

U Deputy Commissioner West Jaiñtia Hills District Garod LSN Dykes IAS uba long kum u symbud kongsan haba kren ula ban jur ïa ki nongshnong ban shimkhia ïa kano kano ka bynta ba ki trei khnang ba kan warah ïa u soh jong ka jingjop. Kum juh ruh u ai mynsiem ia ki SHGs ban nang ïai minot ban trei bad ki dei ban don ka mynsiem iaishah.

U Ma Coming One Ymbon, Myntri Sorkar ba dei peit iaka tnad Fisheries bad kiwei ula ong ba ki dkhot bad ki nongïalam jong ki SHG (Self Help Group) ki dei ban don jingshaniah markylliang bad ban ïatreilang ha kano kano ki kam ban ïaid shakhmat ki kam jong ka kynhun (SHGs).

“Kano kano ka kynhun ne SHGs khlem ka jingiatreilang ki nongialam ne dkhot kin nym lah ban pyntyllun shakhmat ïaki kam bad ïoh jingmyntoi, hynrei da ka jingiatreilang bad ka jingiasngewthuh jingmut kano kano ka kam kaba phi sdang phin jop,” la ong u Ma Coming.

U ma Coming One haba kren shuh shuh ha katei ka prokram ula ban jur ïaki nongshnong ba ki dei ban long kiba leh khuid namar ba ka jingleh khuid ka dei kaba kongsan ban lait na kino kino ki jingpang bad khot ïaki paidbah pynrung kyrteng ialade haka Scheme MHIS, ka lad jingiarap na ka bynta ban shah sumar ha ki jaka sumar kaba kot T.5 lak.
Halor ka dorkhat kaba la ai ka Wyrcha Village organisation ula kular ban pynïoh ki lad jingiarap bad ula kyntu ruh iaki shynrang ban thaw ïa ki Society ban sdang ïaki kam kiban kyntiew iaka lad kamai jakpoh.

Ha kane ka sngi u ma Coming ula ai ruh ïaka Work Order T. 20, 00, 000/- kum ka jingïarap îa ka na ka bynta ban tei ka School Building jong ka Seiñraij Secondary School, Raliang.