Rakhe Earth Day ka KSU Wapung Unit bad ka Moolamylliang

Syllad | The Rising MeghalayaApril 23, 2021

Ka Khasi Student Union (KSU) Wapung Unit kala rakhe ‘Earth Day’ haka 22 tarik une u bnai halor ka phang “Restore Our Earth” da kaba thung iaki tynrai dieng haki phyllaw jong ki skul kiba don ha Wapung Shnong bad Wapung Skur

Hashwa ka jingthung dieng ka la don ka jingïalang lyngkot ha Moopynïein Govt L.P ba la pynïaid da u Pynshai kupar Dkhar president NEHU haka jingïadonlang u Waheh Shnong Wapung Skur u Satly Ryngkhlem, u Organising Secretary Khliehriat Circle u Shaniahskhem Dkhar bad kiwei kiwei ki dkhot.

La ïoh ki jingkren na u Deiniwan Lyngdoh president KSU Wapung Unit halor kumno ban ïada ïaka mei mariang bad ban pynneh pynsah ïa ki dieng ki siej.

U Damehiwan L Rymbai ula kren ai mynsiem ïaki dkhot ka KSU ban ïada lang ïaka mariang kumba ki ïeng ïada ïaka ri bad ka jaitbynriew.

Hadien ka jingïalang ki dkhot ka KSU Wapung Unit ryngkat ka jingsynrang lang ki khynnah skul bad nonghikai ki la ïashim bynta shitrhem haka jingthung ïaki 70 tylli ki tynrai dieng.

Ha kawei pat ka khubor , ka Dorbar Shnong Moolamylliang ha ka jingiatreilang bad ka Moolamylliang Biodiversity Management Committee kala pynlong iaka jingthung dieng hapoh u pud u sam ka shnong.

Ka jingthung dieng haka shnong Moolamylliang, ka kam khampher ha kaba ki nongshong shnong haka jingialam u waheh shnong kila shimbynta shitrhem ban thung da ki tynrai dieng Sohphan (Jackfruit).